Estudante Instituto São João de Brito (ISJB) no Colegio Santo Inacio de Loiola (CSIL) Ulmera, foti dadus labarik sira ne’ebé afetadu ba inundasaun iha Suku Tibar. Imajen Tatoli/Hortencio Sanzhes.

LIQUIÇA, 10 abril 2021 (TATOLI)–Instituto São João de Brito (ISJB) no Colegio Santo Inacio de Loiola (CSIL) Ulmera liuhosi amu no madre sira hola inisiativa hodi ofrese hahan tasak ba família hamutuk na’in-109-resin ne’ebé afetadu ba dezastre naturál, ne’ebé akontese foin lalais ne’e iha Suku Tibar, Postu Administrativu Bazartete, Munisipiu Liquiça.

Notísia Relevante: Uma 100-resin iha Tibar hetan estragus

Reitór Instituto São João de Brito (ISJB), Pe. Cideligio Hornai. Imajen Tatoli/Hortencio Sanchez.

“Ami ISJB foti inisiativa hodi kolabora ho madre sira iha Ulmera ne’e, hamutuk ho estudante sira hosi ISJB, profesor sira, antigu alunu ISJB no estudante ho profesores hosi Colegio Santo Inacio de Loiola ba hare situasaun komunidade sira iha Tibar. Ami ba haree nota katak komunidade hirak ne’e presiza duni tulun entaun ami hola medida hodi tein hahan fó ba sira iha dadeer, meiudia, merenda lorokraik nian no han kalan nian,” Reitór ISJB, Pe. Cideligio Hornai Pereira, hateten ba Agéncia Tatoli iha nia rezidénsia, Ulmera, Liquiça, ohin.

Nia dehan, rekursu no forsa ne’ebé sira iha ajuda hosi estudante Instituto São João de Brito (ISJB) no Colegio Santo Inacio de Loiola (CSIL), no madre sira hodi tein hahan ba familia hirak ne’e.

“Rekursu ne’ebé ami iha liuhosi ami-nia kontribuisaun privadu, tau osan uitoan-uitoan hosi profesores sira, madre sira ho osan uitoan ne’ebé ami iha mak sosa modo, matabisu no kafé. Hosi Xefe Suku Ulmera nia tulun Ami hetan mós foos balun hosi MSSI Munisipiu Liquiça. Entaun, foos hirak ne’e mak ami tein hodi fó ba maluk vitima sira ne’e, durante loron haat ona tuir kbiit ne’ebé ami iha. Mekanizmu fó hahan tasak ba familia sira ne’e, ami iha frater ida iha ne’e, nia identifika hotu mak madre no alunu sira tein ami lori ba fahe ba kada ema,” padre ne’e hateten.

Nia hatutan, sira nia parte kontaktu mós ba padre Jesuita maluk ne’e hela iha Dili hodi oferese mós osan uitoan hodi sosa hahan liuliu sosa modo no sosa mós labarik sira-nia presiza hanesan susu-been no jus balun, hodi tahan sira-nia enerjia ba loron tomak.

Amu ne’e relata, durante loron haat ajuda no deskobre ona katak kuaze 50% mak rekoopera ona tanba eletrisidade komesa lakan, nune’e familia hirak ne’e bele hamoris ona sira-nia bee Sanyo no bele tein rasik ona.

Imajen Tatoli/Hortencio Sanchez.

“Horsehik ami fó apoiu ai-maran balu ba sira, nune’e bele tein rasik ona. Hosi ida-ne’e, sira bele book an ona. Estoke ai-han ne’ebé ami iha sei hela uitoan entaun ami sei jere oinsá atu fó ba sira ne’ebé mak presiza liu. Kona-ba matabixu semana ida-ne’e, ba oin, ami sei fó nafatin liuliu labarik sira tanba haree sira presiza liu. Agora dadauk ha’u atu ba simu ajudu balun hosi kolega sira hosi Dili, hosi korru Katedral Dili, sira hola ona sasán balun hanesan roupa, biti, bikan no kanuru atu apoiu familia sira-ne’e,” nia hateten.

Alende ajuda hahan tasak, hosi parte ISJB mós ajuda bee-moos ba komunidade afetadu sira hodi hemu no hamoos sira-nia uma laran ne’ebé nakonu ho tahu-nurak.

Padre ne’e hatutan, objetivu hosi apoiu ne’e hanesan resposta emediata ida hodi tahan ema hirak ne’e nia moris durante semana ida ka rua nia laran to’o sira bele iha fali kbiit. Tanba, tuir planu, bainhira Serka Sanitaria ne’e hotu, estudante no profesor sira atu ba fó apoiu morál espiritual ba sira atu husu sira partilla sira-nia sentimentu hosi akontesimentu ne’ebé sira ultrapasa ona.

Iha sorin seluk, Koordenadór Levantamentu Dadus Ministeriu Soilidaridade Sosial no Inkluzaun (MSSI) Liquiça, Deonisio de Jesus da Costa, hateten sira nia parte fó apoiu foos hamutuk saka 20-resin no supermie balun ba padre Jesuita sira iha ISJB hodi tulun familia sira iha Tibar.

“Los duni, ita ajuda foos saku 20-resin ba sira. Iha etapa primeiru, tula foos saka 10. Etapa segundu, saka 10-resin ho supermie ba amu sira hodi tein hahan ba komunidade hirak ne’e,” Deonisio de Jesus da Costa hateten.

Iha biban hanesan, reprezentante família vitima ne’ebé simu ajudu hahan tasak hosi padre sira, Maria Lurdes, hateten sente kontente tanba bele hetan hahan tasak hosi amu sira hodi konsumu.

“Ami agradese ba madre, padre sira hosi ISJB no Santo Inacio de Loiola ne’ebé tulun ona ami. Ho sira-nia tulun, ami bele moris,” Maria Lurdes hato’o agradesimentu.

Jornalista: Hortencio Sanchez

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here