Espoza Przidente Repúblika, Cidália Nobre Lopes Mouzinho Guterres, konversa hela ho inan isin-rua ne’ebé evakua no hela iha sentru evakuasaun. Imajen/Mídia PR.

DILI, 10 abril 2021 (TATOLI)—Gabinete de Apoio à Atividade do Conjuge do Presidente Republica (GAAC-PR), ohin, hamutuk ho parseiru servisu Rede Feto Timor-Leste, Fundasaun Sadia no Plan Internasional kontinua halo vizita no fó apoiu nesesidade bázika ba vítima dezastre naturál iha Aldeia Cinco de Outubro, Suku Bairru Píte, Postu Administrativu Don Aleixo, Munisípiu Dili.

Notísia Relevante: Apoiu umanitáriu ne’ebé Espoza PR fahe maihosi GAAC-PR

Espoza Prezidente Repúblika, Cidália Nobre Lopes Mouzinho Guterres, preokupa no husu ba autoridade lokál sira atu halo servisu makaas hodi fó informasaun relasiona ho inundasaun liuliu kona-ba inan isin-rua ne’ebé besik atu tur-ahi no ema vulnerável sira.

“Ha’u husu autoridade lokál sira no responsável sentru evakuasaun sira tenke servisu makaas hodi fó informasaun relasiona ho inundasaun liuliu inan isin-rua no ema vulnerável ne’ebé presiza duni tulun hosi ita. Ba ami, Gabinete Espoza no Prezidente Repúblika nian, ita prontu simu no fó tulun,” Espoza PR, Cidália Nobre Lopes Mouzinho Guterres, hatete ba jornalista sira, iha Aldeia Cinco de Outubro, Bairru Píte, Dili, sábadu ne’e.

Espoza PR kontinua fó korajén ba komunidade afetadu sira katak na’in ulun sira la toba dukur ba saida mak komunidade enfrenta iha dezastre naturál ne’e, tanba maske servisu no kompeténsia ne’e ida-idak nian maibé koordenasaun ne’e sempre hamutuk hodi fó apoiu ba vítima sira iha situasaun defísil nia laran.

Nia hateten, Gabinete Espoza Prezidente kontinua fó apoiu umanitáriu liuhosi fahe sasán nesesidade bázika ba komunidade afetadu sira, maibé kona-ba uma sira-ne’ebé estragu ne’e Governu mak sei haree tanba daudaun ne’e ekipa tún ona ba terrenu hodi rekolla dadus.

“Ita-nia parte mak fó ai-han ba família afetadu sira hodi augenta moris. Ami-nia preokupasaun mak ba inan isin-rua iha fatin barak ne’ebé balun hein loron de’it atu tur-ahi, presiza bebé nia sasán no ba ema vulnerável liu,” nia hatetetn.

Iha biban ne’e, Espoza PR agradese ba tulun ne’ebé mak ema hotu-hotu kontribui ba vítima dezastre naturál liuliu hosi Estadu, Governu, konfesaun relijiozu, Organizasaun Naun Governamentál, seguransa no militár sira inklui parseiru ne’ebé durante ne’e servisu hamutuk ho Komisaun Sadia, Plan Internasionál no Rede Feto.

Gabinete Espoza PR ho nia ekipa fahe nesesidade bázika hanesan foos, mina, susu-been, energen, indomilk, sabaun, pastadente, manta, biti no seluk tan.

Iha fatin hanesan, Xefe Aldeia Cinco de Outubro, Suku Bairru Píte, Postu Administrativu Don Aleixo, Munisípiu Dili, Orlando da Costa, hateten nia parte sente kontente ba prezensa Espoza PR nian tanba bele rona direta afetadu sira-nia halerik.

“Nu’udar lideransa komunitária, ha’u sente kontente tanba ita-nia populasaun afetadu dezastre naturál, inan nasaun Timor-Leste ne’e to’o duni iha fatin no observa direta komunidade nia halerik. Ho ne’e, ha’u hakarak hato’o agradese ba ba Espoza PR tanba ho laran luak hodi vizita vítima sira,” nia dehan.

Tuir nia, komunidade iha fatin ne’e terús liu ona tanba durante tinan rua nia-laran enfrenta moras COVID-19 no agora enfrenta tan inundasaun ne’ebé sira-nia uma no sasán hetan estragu no lakon.

“Ha’u-nia komunidade ne’ebé afeta ba dezastre naturál ne’e uma-kain hamutuk 46 no estragu totál ne’e hamutuk uma-kain lima. Hosi afetadu grave ne’e família rua mak hela ho ha’u to’o agora,” nia informa.

Nia informa, preokupasaun hirak ne’e nia parte hato’o ona ba parte relevante no hein de’it resposta.

Totál populasaun iha Aldeia Cinco de Outubro hamutuk 1.054 no xefe família hamutuk 257.

Jornalista: Osória Marques

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here