Matebian Fredolino Kefi. Imajen/Espesiál.

DILI, 10 abríl 2021 (TATOLI)–Prezidente Autoridade Rejiaun Administrativa Espeiál Oé-Cusse Ambeno (RAEOA), Arsénio Paixão Bano, hateten autoridade RAEOA sei aluga aviaun Mision Aviation Fellowship (MAF) ho valór montante $1.450 hodi transporta matebian Fredolino Kefi nia mate-isin ba Oé-Cusse.

Notísia Relevante: Komunidade Saleziana no Jesuita despede matebian Alcino Cristóvão Kefi

Arsénio Paixão Bano hatutan, prosesu atu transporta mate-isin ida hosi fatin ida ba fatin seluk inklui mós ba iha Oé-Cusse, ne’e serbisu Governu Sentrál mak toma konta. Tanba, foin lalais mate-isin ida hosi kapital Dili transporta mai iha Oé-Cusse, serbisu sentrál liuliu Ministeriu Soliedariedade Sosiál no Inkluzaun (MSSI) ho Ministeriu Saude (MS) mak toma konta, hahú hosi prosesu dokumentu to’o aluga aviaun MAF iha semana hirak liu ba.

“Ha’u hanoin kona-ba mate-isin Fredolino Kefi, autoridade RAEOA hetan informasaun hosi familia no autoridade RAEOA mós komprende katak Dili iha problema barak mak MSSI no MS atua hela situasaun kalamidade ne’e. Autoridade RAEOA sei aluga aviaun Mision Aviation Fellowship (MAF) ho valór montante $1.450 hodi transporta matebian Fredolino Kefi nia mate-isin ba Oé-Cusse,” Arsénio Paixão Bano hateten ba Agência TATOLI liuhosi telefónika, sábadu ne’e.

Nia dehan, ho razaun ne’e mak nia parte fó ona informasaun ba iha família katak autoridade RAEOA mak sei toma konta prosesu hotu inklui mós aluga aviaun MAF, no iha semana oin, segunda (12/04) no tersa (13/04), autoridade RAEOA mak sei lori matebian nia mate-isin mai iha Oé-Cusse.

Iha fatin hanesan, familia matebian Thomas Oki hateten kona-ba prossesu dokumetu sira liuliu karta autorizasaun hosi Sentru Integradu Jestaun Krije (SIJK), tanba ho tulun hosi MSSI no MS.

“Maibé, ami família sente uitoan mak kbiit atu aluga aviaun MAF ho montante $1.450 no ami hein Governu mós la realiza hela de’it. Tanba ne’e mak ami família hodi kalan telefone ba Presidente RAEOA no simu ami-nia pedidu atu aluga aviaun MAF hodi transporta mate-isin alin nian ba Oé-Cusse,” nia dehan.

Nia dehan, oras ne’e daudaun autoridade RAEOA ho família sira kontinua halo kontaktu atu bele lori mate-isin Fredolino Kefi ba Oé-Cusse.

“Ami familia sente triste tanba nia mate-isin rai iha jeleira durante semana ida ona iha HNGV. Ha’u hanoin kona ba data fixa, ami família seidauk hatene klaru maibe espera katak bele realiza iha loron hirak tuir mai,” nia hateten.

Nia hatutan, nu’udar Oé-Cusse-oan agradese tebes ba Presidente RAEOA, Arsénio Bano, ho ninia komitiva tomak ne’ebé mak sempre apoiu ninia populasaun iha kualker momentu.

Aviaun ambulansia ne’ebé Governu Timor-Leste kontrata hosi kompañia Mision Aviation Fellowship (MAP) iha tinan 2020.

Tuir informasaun ne’ebe mak Agênsia TATOLI observa iha Hospital Nasional Guido Valadares (HNGV) katak mate isin Fredolino Kefi daudaun ne’e sei haloot hela iha mortuáriu.

Iha loron 04 abril 2021, matebian Fredolino Kefi hamutuk ho ninia primu eis-frater Salesianu ida, profesór Alcino Cristovão Kefi (hakoi iha Lavateri, Baucau), sira na’in-rua sai vítima ba udan boot ka dezastre naturál no hakotu ona sira-nia jornada moris iha mundu.

Jornalista: Domingos Piedade Freitas

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here