Administradór Postu Administrativu Ataúro, Mateus Belo. Imajen Espesiál.

DILI, 09 abril 2021 (TATOLI)—Administradór Postu Administrativu Ataúro, Mateus Belo, husu Governu termina serka sanitaria no konfinamentu domisiliáriu tanba nesesidade bázika menus no fó impaktu ba rendimentu família nian.

Mateus Belo hatutan, hafoin Governu implementa serka sanitária ne’e sasán no produtu lokál ne’ebé komunidade faan ne’e ema la hola, tanba laiha movimentasaun transporte ró hosi Dili ba-mai Ataúro.

“Espera katak Governu bele termina lalais serka sanitária ne’e tanba besik fulan ida ona, komunidade sente rendimentu menus no ekomómia komunidade nian la la’o. Tanba, hanesan ita hotu hateten Atauro ne’e komunidade maiória depende ba peskadór hotu, ne’ebé serka sanitária nafatin, ida-ne’e impaktu boot ba sira tanba la hetan osan atu sustenta família. Liuliu agora ne’e nesesidade bázika menus, loja sira mós hahú hasa’e sasán nia folin tanba ró la halo movimentu hosi Dili mai Ataúro. Entaun, ami agora araska ba nesesidade bázika,” Mateus Belo hateten ba Agência TATOLI liuhosi telefónika, sesta ne’e.

Nia dehan, komunidade atu hetan fali rendimentu entaun Governu tenke termina serka sanitária, atu peskadór sira bele lori sira-nia ikan ba faan iha Dili hodi hetan osan no maluk sira hosi Dili bele mai Atauro sosa ikan, budu tasi no prudutu lokál sira seluk ne’ebé komunidade faan iha tasi ibun, nune’e ekonómia komunidade nian bele rekupera fila-fali.

“Tanba movimentasaun transporte públiku ne’ebé la la’o entaun afeta ba ekonómia komunidade nian. Tanba ami rai ketan tan no laiha transporte públiku boot no laiha transporte lojístiku, liuliu nesesidade báziku ne’e menus entaun fó impaktu ba komunidade nia moris,” nia dehan.

Tanba ne’e, nia sujere ba Governu Sentrál liuhosi Ministériu Transpote no Komunikasaun ho Autoridade Portuáriu Timor-Leste (APORTIL) no parte relevante sira seluk katak, karik bele reativa fali movimentasaun transporte Dili Ataúro atu ekonómia komunidade nian bele rekopera fila-fali.

“Tanba Ami Ataúro fulan ida resin ona asesu ba eletrisidade ne’e oras lima de’it. Lakan tuku hitu kalan to’o oras 00:00, tanba ró la halai difikulta tebes mina, entaun ahi lakan oras lima de’it, nune’e ami atu bele rezerva kombustivél,” nia haktuir.

Aleinde ne’e, nia mós husu Govenu atu foos ne’ebé Governu faan ne’e bele halo intervensaun ba merkadu nune’e komunidade bele asesu foos ho folin baratu uitoan iha situasaun agora ne’e, tanba povu difisil tebes atu hetan foos.

“Ami mós submete ona dadus loloos kona-ba estoke foos mai Atauro ne’e hamutuk saka 2.000 resin, atu apoiu ba komunidade Atauro hanesan foin lalais Governu fó apoiu foos ba komunidade iha Dili laran. Ne’ebé, ami husu funsionamentu ró ne’e importante atu nune’e bele lori foos sira ne’e mai fahe ba abitante sira,” nia hateten.

Kona-ba dezastre naturál, nia hatán, udan no anin boot ne’ebé foin lalais akontese iha domingu (04/04) semana kotuk, estraga komunidade nia uma hamutuk 13 no uma rua mak grave liu.

“Kona-ba akontesimentu dezastre naturál ne’ebé foin lalais akontese iha Kapitál Dili, ba Ataúro laiha inundasaun maibé kondisaun ne’ebé mak kauza hosi udan no anin boot mak iha ne’e anin sobu komunidade-nia uma. Ita rezistu uma 13 mak anin sobu maibé hosi uma 13 ne’e uma rua mak grave liu no 11 aat kmaan,” nia informa.

Administradór ne’e hatutan, abitante sira-nia uma kondisaun rua ne’ebé grave no 11 aat kamaan ne’e daudaun uma-nain no komunidade ho komunidade mak ajuda malu adi’a hotu uma sira ne’ebé aat, entaun vítima sira ida-idak hela fali ona sira-nia uma. 

“Tanba ita la rezistu hanesan akontesimentu inundasaun iha Dili, komunidade balun lakon uma tanba mota sobu, maibé iha ne’e anin mak sobu tomak entaun ita fó apoiu umanitária hanesan sasán dapur nian no ai-han, atu sira bele konsumu,” nia dehan.

Jornalista: Arminda Fonseca 

Editór: Cancio Ximenes

1 KOMENTÁRIU

  1. Obrigado Sr.Administrador nbe ble fo hnoin ona ba ita nia Estadu ho preocupasaun nebe ita nia comunidade hasoru 🙏🙏🙏
    GB TL especial Ataúro 💪💪💪

HAKEREK NO HATÁN

Please enter your comment!
Please enter your name here