Membru FFDTL hamoos hela tahu-dodok iha Palásiu Prezidénsia Repúblika hafoin inundasaun iha loron 04 abríl, Kuarta (8/04/2021) Imajen/Antonio Gonçalves

DILI, 09 abríl 2021 (TATOLI)- Komandu FALINTIL-Forsa Defeza Timor-Leste (F-FDTL), kinta to’o sesta (08-09/04), koloka nia membru hamutuk 250 hodi halo limpeza jerál iha arredores Palásiu Prezidensiál, Dili.

Notísia Relevante : F-FDTL harii tenda-10 ba vítima dezastre naturál iha Tasi-Tol

Membru FFDTL kontinua hamoos tahu-dodok iha Palásiu Prezidénsia Repúblika. Imajen Tatoli/António Gonçalves

Dezastre naturál, udan no anin boot  ho rai-halai ne’ebé akontese iha domingu (04/04), halo mota Maloa tun maka’as hamosu inundasaun iha Palásiu Prezidensiál hodi afeta mós ba komunidade hosi Suku Bairru-Pite, Kampung Alor, Aitarak-Laran, Farol no Palapasu nian.

Xefe Estadu Maiór Jenerál F-FDTL, Tenente Jenerál Lere Anan Timur, ba jornalista sira hateten, prezensa forsa sira ne’e mai hosi Komponente Apoia Servisu (CAS) no Sentru Formasaun Terrenu (CFT) hamutuk ho Funsionáriu Gabinete Prezidensiál Repúblika atu hamoos fo’er to’o moos hodi fasilita servisu Gabinete Prezidénsia  Repúblika nian.

Prezensa forsa sira ne’e sei hamoos dasa sai hotu tahu nurak ne’e, sei lori bee hodi rega tuituir to’o tahu-nurak sira moos hotu ona, foin bele retira sira fila ba kuartél.

Ekipa sira ne’ebé kompostu hosi membru F-FDTL, PNTL, Korpu Bombeiru, Ekipa Saneamentu Munisipiu Dili, no ekipa Ministériu Obras Publika (MOP) ne’e lori mós ekipamentu pezadu hodi dudu sai tahu-nurak sira ne’ebé maka nakonu iha arredores Palásiu Prezidénsia Repúblika .

Iha parte seluk, Komandu F-FDTL liuhosi ekipa  Enjeñaria  mós daudaun ne’e lori ona ekipamentu ba hala’o instalasaun iha área Uma Lisan, Tasi-Tolu hodi instala fatin harii fatin karreta kuziña mobile hodi militár sira bele halo atividade te’in hahán ajuda refujiadu sira iha área Masin Lidun, Lagoa Tasi-Tolu  to’o área foho João Paulo II, Tasi-Tolu, Dili.

Notísia Relevante : F-FDTL ho AFAMA apoiu nesesidade báziku ba refujiadu sira

Informasaun ne’ebé Agência Tatoli rekolla hosi membru sira ne’ebé destaka iha Tasi-tolu, katak, karreta kuziña mobile rua ne’ebé koloka iha Tasi-Tolu loron ida sei te’in hahán ho hodi fahe ba ema na’in-1.000.

Ai-han ne’ebé te’in ba komunidade sira-ne’e suporta direita hosi Komandu F-FDTL nu’udar jestu hodi espresa Komandu F-FDTL nia domin ba povu ne’ebé enfrenta taterus iha dezastre naturál hosi loron 04 abríl to’o mai ohin loron.

Jornalista       : Eugénio Pereira

Editór             : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here