Fonte Fotografia: Martin Abegglen husi Bern, Swiss.

Hosi: Helen Yaffe

Oinsá ita bele esplika sira nia atinjimentu sira ne’e? bioteknolojia Kuba nian ne’e uniku duni; kuaze Estadu mak funda no nain, livre husi interese privadu sira, la buka lukru doméstikamente, no inovasaun ne’ebé kanaliza hodi hatan nesesidade saúde públiku nian. Instituisaun ba peskiza no dezenvolvimentu lubun-wain mak kolabora-malu, fahe rekursu no kuñesimentu, duke kompete, ne’ebé ke fasilita dalan lais tebes husi kedas peskiza no dezenvolvimentu to’o ba teste no aplikasaun.

Iha 23 marsu 2021, Primeiru Ministru Britániu, Boris Johnson, hatete ba grupu Partidu Konservativu nia apoiante-sira: “razaun ba ita nia susesu ba vasina ne’e mak kapitalismu, tanba nia kanten, hau nia maluk-sira.” Johnson artikula hela dogma katak buka lukru privadu liu husi merkadu livre kapitalista nian sei lori ba rezultadu-sira efisiensia. Maske nune’e, iha realidade, Britániu nia atinjimentu-sira iha dezenvolvimentu vasina Oxford AstraZeneca no lansamentu nasionál ba vasinasaun ne’e liga liu ho investimentu Estadu nian duke mekanismu merkadu nian sira. Osan governu nian mak halo subsidiu ba dezenvolvimentu vasina iha Universidade Oxford, no ne’e sistema Servisu Saúde Nasionál ne’ebé funda husi Estadu mak hala’o tiha programa vasinasaun ne’e. Buat ne’ebé Johnson la rekoñese maka husi kapitalismu ne’e duni ho nia ambisaun sira ne’e mak Britániu agora daudaun iha rasio mortalidade aat liu ba dala-lima iha mundu ho ema mate 126,500 (kuaze 1,857 kada ema tokon ida husi populasaun ninian) no sei sura ba bebeik.

Governu Britániu, hanesan mos rejime-sira neoliberál, ne’ebé rejeita hodi foti pasu nesesáriu sira ne’ebé presiza hodi trava no hapara transmisaun komunitáriu, nia falla kedas desde inisiu hodi fornese Ekipamentu Protesaun Pesoal (PPE) ne’ebé adekuadu ba traballadór asistente saúde no servidór sosiál sira no rekursu-sira seluk hodi bele salva pesoál liña frente sira atus-ba-atus ne’ebé mate husi rezultadu ne’e nian. Nia kontrata empreza privadu hodi hala’o atividade esensiál sira, kuaze ho esperiensia uitoan no laiha relevante, ezemplu hirak, duke reforsa sistema GP ho baze komunidade iha Servisu Saúde Nasionál hodi hala’o responsabilidade ba ‘track and trace’, fila governu aloka fali billaun 37 euro ba Serco hodi jere parte tomak husi sistema ne’e.

Iha perspetiva saúde públika ne’e nu’udar pasu dezastre; maibé sukat husi Boris Johnson nia padraun selebrasaun ho kapitalismu no kanten maka ne’e exelente tebes. Benefisiáriu bo’ot-liu husi Britániu nia responde ba pandemia maka korporasaun privadu sira ne’ebé hala’o lukru bo’ot husi ne’e. Entre Accenture 2,500, konsultór-sira Deloitte no Mckinsey nian ho pagamentu loron ida hetan £1,000, no balun hetan selu £ 6,624 kada loron.

Johnson agora daudaun prepara dalan ba loke-hikas ekonomia. Ho rezultadu, maske ho eskenáriu optimistiku mos prevee katak laloran datolu entre setembru 2021 no janeiru 2022 sei rezulta pelumenus mate adisionál 30,000 iha Britániu. Mate sira ne’e bele prevene. Maibé ne’e presizamente duni, tanba governu Britániu nian dudu husi kapitalismu no kanten ne’ebé insisti katak ita tenki aprende hodi ‘moris ho virus’ atu nune’e korporativu nia negósiu bele kontinua.

Kontráriu ho Jonhson nia reivindikasaun, pandemia ne’e afirma ona katak nesesidade ba saúde públika labele atinje adekuadamente iha sistema ho baze-rendimentu ne’e nia okos. Loos duni, ho absensia ba motivu rendimentu kapitalista nian mak sai baze ba resposta doméstiku no internasionál ne’ebé exepsionál husi sosialista Kuba, ne’ebé mak agora daudaun iha vasina oin-lima iha teste klíniku sira no iha dalan atu sai nasaun primeiru ne’ebé vasina tomak nia populasaun.

Husi reajem lalais no desisivu, liuhusi mobiliza nia sistema tratamentu saúde públika no setór bioteknolojia lideradu iha mundu, Kuba manten kontajiaun no fatalidade ne’ebé kiik. Iha 2020 Kuba konfirma kazu koronavirus ho totál 12,225 no 146 mak mate iha populasaun ho ema tokon 11,2 ne’e, entre rasio kiik liu iha hemisferiu Osidentál. Iha novembru 2020, aeroportu-sira loke fila hikas, lori to’o ba infeksaun sira mosu liu tan iha janeiru 2021 duke tinan kotuk nian tomak. Iha 24 marsu 2021, Kuba rejistu kazu kuaze 70,000 no mate 408. Rasio mate nian mak 35 entre tokon ida no rasio fatalidade entre 0.59% (2.2% iha mundu; 2.9% iha Britániu). Iha tinan ida nia laran, brigade médiku espesialista hamutuk 57 husi Kuba nia Henry Reeve International Contingent fó tratamentu pasiente Covid-19 hamutuk tokon 1.26 iha pais 40; sira halibur hamutuk ho profisionál saúde Kuba nian hamutuk 28,000 iha pais 40 sira ne’e. Kuba nia atinjimentu sira ne’e estraordináriu maka fó hanoin de’it katak husi 2017 mai oin, administrasaun Trump nian fó sansaun, asaun no pasu foun hamutuk 240 hodi hakas liu tan blokade durante tinan 60 ona ba Kuba, inklui mos pasu besik 50 durante pandemia ne’ebé fó impaktu aat ba setór saúde de’it kuaze tokon $200.

Kuba halo ona ataka ofensiva hasoru Covid-19, mobilizasaun fokus-ba-prevensaun, sistema tratamentu saúde ho baze komunitária hodi hala’o vizita diária ba uma-kain atu bele ativamente deteta no trata kazu sira no mos loke dalan ba setór siénsia medikál nian hodi adapta no prodús tratamentu foun sira ba pasiente-sira no vasina espesifika ba Covid-19 nian sira. Avansu sira ne’e la’ós de’it lori esperansa ba Kuba, maibé mos ba mundu.

Saida mak espesiál kona-ba Kuba nia vasina sira?

Kuaze vasina sira entre 200 mak dezenvolve ona iha mundu laran; Husi Marsu 2021, kandidatu 23 avansa ona ba ezaminasaun klíniku faze III nian. Rua husi sira ne’e Kubanu nian (Soberana 2 no Abdala). Nem pais Latina Amérika ida mak dezenvolve rasik ona nia vasina iha faze ida ne’e. Kuba iha vasina tolu seluk tan ne’ebé kandidata ona mos iha faze inisiu experimentasaun nian (Soberana 1, Soberana Plus no mos vasina intrasanál, sem-daun bolu Mambisa). Oinsá ita bele esplika sira nia atinjimentu sira ne’e? bioteknolojia Kuba nian ne’e uniku duni; kuaze Estadu mak funda no nain, livre husi interese privadu sira, la buka lukru doméstikamente, no inovasaun ne’ebé kanaliza hodi hatan nesesidade saúde públika nian. Instituisaun ba peskiza no dezenvolvimentu lubun-wain mak kolabora-malu, fahe rekursu no kuñesimentu, duke kompete, ne’ebé ke fasilita dalan lais tebes husi kedas peskiza no dezenvolvimentu to’o ba teste no aplikasaun. Kuba iha kapasidade hodi prodús aimoruk 60-70% ba nia konsumu doméstiku, imperativu ida tanba blokade Estadu Unidu Amérika (EUA) no kustu husi aimoruk iha merkadu internasionál. Iha mos fluxo iha universidade-sira, sentru peskiza no mos sistema saúde públiku. Elementu sira ne’e prova ona sai vital ba dezenvolvimentu Kuba nia vasina Covid-19 sira.

Iha tipu lima vasina Covid-19 ne’ebé dezenvolve daudaun iha mundu:

  • Vasina vetor ba virus, ne’ebé injeta virus ida ne’ebé la fó ameasa hafoin modifika tiha hodi manda hasoru materiál jenetiku SARS-CoV-2 (Oxford AstraZeneca, Gamaleya no Sputnik V);
  • Vasina jenetiku ne’ebé hasoru segmentu materiál jenetika virus SARS-CoV-2 (Pfizer, Moderna);
  • Vasina dezativadu ne’ebé hasoru dezativasaun virus SARS-CoV-2 (Sinovac/Butantan, SinoPharm, Bharat Biotec);
  • Vasina ba hafraku ne’ebé iha hodi ba hafraku virus SARS-CoV (Codagenix)
  • Vasina ho baze proteina ne’ebé hasoru proteina husi virus nian ne’ebé sei provoka resposta imunidade (Novavax, Sanofi/GSK)

Vasina lima Kuba nian iha teste klínikal nian sira mesak vasina proteina; sira lori porsaun proteina virus nian ne’ebé kait metin ba selula ema nian; ne’e sei hamosu hodi neutraliza antibodi atu blokeia prosesu hakesik ne’e. Dr. Marlene Ramirez Gonzalez esplika katak sira ne’e ‘subunidade vasina’, ida ne’ebé ekonómikamente liu no tipu ne’ebé Kuba iha nia infraestrutura kuñesimentu makas tebes. Husi proteina S – antigen ou parte husi virus SARS-CoV2 ne’ebé vasina Covid nian sira tarjetu ba tanba ida ne’e hasae resposta imunidade ne’ebé bo’ot iha ema – kandidatura Kubanu nian sira ne’e baze de’it ba parte ne’ebé involve iha kontatu ho selula reseptor: RBD (dominio Reseptor-Obrigatóriu) ne’ebé mos mak ida hasae numeru bo’ot ba neutralizadór antibodi nian.

Estratejia ne’e la’ós exkluzivu de’it ba Kuba nia vasina. Maibé Soberana 2 distingi nia-an husi kandidatu selseluk iha mundu tan nia mak uniku hanesan ‘conjugate vaccine’. Daudaun ne’e iha faze teste klínikal III, nia kombina RBD ho tetanus toxoid, ne’ebé mak amenta resposta imunidade nian … Kuba dezenvolve ona vasina seluk ho prinsipiu ne’e. Ne’e mak Quimi-Hib, “primeiru husi nia espesie ne’ebé aprova ona iha Latina Amérika no daruak iha mundu”, hodi hasoru Haemophilus influenza tipu b, coccobacilli ne’ebé responsabiliza ba moras hanesan meningitis, pneumonia no epiglottitis.[1]

Idania Caballero, sientista farmasia iha BioCubaFarma fó sai katak vasina harii durante dekada hirak husi siénsia medikál no servisu sira ba moras daet/kontajioza/doenças infecciosas Rasio mortalidade iha Kuba tan moras daet, ate iha tempu Covid, menus husi 1%. Kuba ohin loron vasina ona hasoru moras 13 ho vasina 11, Ualu(8) husi ne’e prodús rasik husi Kuba. Moras lima elimina ona nu’udar rezultadu kalendariu vasinasaun. Vasina sira ne’ebé prodús husi teknolojia sira administra tomak ate to’o labarik bebe foin moris iha fulan ida.[2]

Vasina Soberana prodús husi Institutu Finlay hala’o parseria ho Sentru ba Imunolojia Molekulár (CIM) no mos Sentru ba Biopreparados. Seberana katak ‘soberania’, refleta nia importansia ekonómiku no politika; sem produtu doméstiku, Kuba sei luta hodi asesu ba vasina estranjeiru sira entre ida tanba blokade EUA ou ba kustu selseluk. Soberana inserta informasaun jenetiku ba iha selula superior sira mamalia nian. Soberana Plus nu’udar vasina Covid-19 ba pasiente rekuperadu nian ne’ebé primeiru iha mundu ke atinje ona teste klínikall sira.

Vasina sira seluk, Abdala ho Mambisa, naran ne’ebé atribui hotu ba Kuba nia luta ba independensia, prodús husi Center of Genetic Engineering and Biotechnology (CIGB). Vasina sira ne’e inserta informasaun jenetiku iha organizmu ne’ebé ladun evolve, mikroorganismu uniselular (levedura Pichia Pastoris). Sira harii iha atinjimentu estraordináriu CIBD nian sira, inklui mak hanesan nia vasina Hepatitis B, ne’ebé uza ona iha Kuba durante ba tinan 25 nia laran.

Liu husi dezenvolve plataforma vasina nian ne’ebé lahanesan, instituisaun sira ne’e prevene kompetisaun ba rekursu. Caballero esplika katak: ‘Kuba iha kapasidade hodi prodús vasina dalas rua ne’ebé independente, ho kuaze vasina tokon 90 anualmente, iha kondisaun hanesan mos nia mantem rekerimentu ba produsaun produtu-sira seluk ba merkadu doméstiku no ba esporta’. Vasina Kuba nia presiza dosis tolu no sira estabel nafatin iha temperatura sira entre grau 2 no 8, no lapresiza kustu espesiál ba ekipamentu zileira/konjeladór.

Faze teste III no intervensaun estudu

Iha ikus husi marsu, teste faze III hala’o daudaun ba Soberana 2 ho Abdala, entre hirak ne’e inkorpora voluntariu 44,000 ho idade liu 19 iha rejiaun ho insidente Covid aas. Soberana 2 hala’o iha Havana no Abdala iha Santiago de Kuba ho mos Guantanamo. Analiza no asaun tuir mai ba pasiente ne’ebé esperimenta sei kontinua to’o janeiru 2022 atu investiga katak sira prevene duni daet, imunidade ne’e satan to’o bainhira, no kestaun selseluk ne’ebé seidauk bele hatan husi produtor sira. Maske nune’e, ofisiál saúde adisionál 150.000 hetan simu ona vasina Soberana 2, nu’udar parte ba ‘estudu intervensaun’, nu’udar forma ida husi experimentasaun klínikal ne’ebé bele autoriza hafoin aimoruk nia seguru/konfiabilidade ne’ebé demonstra ona iha faze II. Estudu intervensaun la involve teste dubru ne’ebé delek ou plasebo sira. Ofisiál saúde iha parte Osidente Kuba nian hamutuk 120,000 sei simu Abdala iha semana hirak tuir mai. Estudu intervensionál sira seluk iha kapitál mos sei hala’o tuir mai ba ema tokon 1.7 iha Havana, barak liu ba populasaun adultu, sei vasina iha fim maiu 2021 nian, ne’e katak Kubanu tokon 2 sei hetan vasinasaun tomak.

Ho asumsaun ba rezultadu satisfatóriu, iha juñu, kampaña real nasionál ba vasinasaun sei hahú, prioritiza ba grupu sira ne’ebé bazeia ba fatór-sira risku nian no hahú ho ema sira liu idade 60. Entre fim agostu 2021, Kubanu tokon nem (6), kuaze sorin-balun populasaun nian, sei kobre tomak no iha fim tinan ne’e, Kuba sei sai pais primeiru iha mundu ne’ebé vasina tomak nia populasaun.

Sientista medikál Kuba nian fiar-an katak sira iha kapasidade no esperiensia hodi adapta sira nia formulasaun vasina, teknolojia no protokolu asaun sira hodi hatan ba variadade foun. Pasu tuir mai mak Soberana 1 no Soberana Plus hodi tama ba faze teste II no estudu foun ne’ebé involve ema idade 5 to’o 18 sei lansa sai.

Kuba ho Xina servisu hamutuk ba Pan-Corona

Kuba nia CIGB servisu hamutuk ho sira nia belun husi Xina hodi servisu ba vasina foun bolu Pan-Corona, ne’ebé dezeña atu bele efetivu liu ba espesie oioin korona virus nian. Ne’e sei uza parte balun sira husi virus ne’ebé konserva, hodi hamosu antibodi, kombina tan ho parte oioin ne’ebé direta ba resposta selular. Kuba kontribui esperiensia no pesoál, maibé Xineza fornese ekipamentu no rekursu. Peskiza sei hala’o iha Yongzhou Joint Biotechnology Innovation Center, iha China nia provinsia Hunan, ne’ebé mak estabelese ona iha tinan kotuk hamutuk ho ekipamentu no laboratóriu sira ne’ebé dezeña husi espesialista Kuba nian. Gerardo Guillen, diretór siénsia biomedisina iha CIGB, hatete dehan aprosimasaun ne’e: ‘sei bele proteje husi situasaun emerjénsia epidemiolojia no espesia foun virus korona ne’ebé mak bele eziste iha futuru mai’. Projetu ne’e harii tanba kolaborasaun siénsia medisina entre Kuba ho Xina ne’ebé hala’o ona durante dekada rua, inklui ho negósiu hamutuk iha setór bioteknolojia.

Vasina ba mundu sul

Profisionál Kuba nian simu medalla osan-mean sanulu husi Organizasaun Mundiál ba Propriedade Intelektuál (WIPO) iha tinan 26 nia laran; sira nia produtu bioteknolojia esporta ba pais 49 molok pandemia, inklui mos vasina uza iha programa imunizasaun labarik iha Latina Amérika. Kuba rasik hateten ona katak sira nia vasina Covid-19 sei esporta hotu ba pais seluk. Ne’e lori esperansa ba nasaun ho rendimentu kiik-mediu sira ne’ebé labele sosa hodi vasina sira nia populasaun ho presu aas (entre $10 no $30 kada dosis) ne’ebé demanda husi farmasia bo’ot sira. Fevereiru 2021, Bureau of Investigative Journalism hato’o katak empreza EUA nian Pfizer ‘hamoe/hanehan’ ona pais Latina Amérika sira hodi tau aset Estadu nian, hanesan edifisiu embaixada no baze militár, nu’udar garansia hasoru kustu ba kazu legais iha futuru mai relasiona ho sira nia vasina Covid-19.[3]

Liu husi konkordansia ho Iraun nia Institutu Pasteur, sidadaun Iraun 100,000 sei hola parte iha faze III teste klínikal ba Soberana 2 no ema 60,000 seluk sei partisipa iha Venezuela. Pais seluk inklui Mexico, Jamaica, Vietnam, Pakistaun, no India, fó sai ona sira nia interese hodi simu vasina Kuba nian sira, no mos hanesan Uniaun Afrikana, ne’ebé reprezenta pais 55 iha Afrika. Iha probalidade katak Kuba sei aplika mudansa ba eskala ba esporta vasina Covid-19, hanesan nia halo ona ho esporta profisionál médiku, tan ne’e hodi selu refleta de’it pais nia abilidade atu selu.

Saida mak Kuba atinje ona ne’e estraordináriu tebes, maibé hanesan hateten ona husi Caballero: ‘sem blokade EUA nian ne’ebé injustu ne’e, Kuba bele hetan rezultadu ne’ebé barak liu no sei di’ak liu tan’. Kuba sai ona lider-mundiál iha bioteknolojia tanba nia iha Estadu sosialista ho planu ekonomia sentrál, ne’ebé mak investe siénsia no teknolojia no tau bem-estar ema nian iha oin molok lukru/rendimentu; ne’e tan, ho absensia kapitalismu no ambisaun/kanten ne’ebé selebra husi Primeiru Ministru Inglatera, Johnson.

Nota-sira.

[1] Rapid response’ letter in The BMJ, 1 March 2021,

[2] Email correspondence, 9 March 2021.

[3]Held to ransom”: Pfizer demands governments gamble with state assets to secure vaccine deal’, Bureau of Investigative Journalism, 23 February 2021.

Artigu ne’e públika ona iha lian inglés iha Counterpunch no lian latina Contexto y Acción. Bele vizita hodi halo leitura ba testu orijinál.

Tradús husi Fernando Ximenes.

Kona-ba autór: Helen Yaffe, dosente iha Istória Ekonómiku no Sosiál iha Universidade Glasgow, espesializadu iha dezenvolvimentu Kuba no Latina Amerika. Nia livru foun We Are Cuba! How a Revolutionary People have survived in a Post-Soviet World foin públika husi Yale University Press. Nia mos autór ba Che Guevara: The Economics of Revolution no ko-autór ho Gavin Brown ba Youth Activism and Solidarity: the Non-Stop Picket against Apartheid.

HAKEREK NO HATÁN

Please enter your comment!
Please enter your name here