AKKXT distribui nesesidade bázika ba vítima dezastre naturál iha aldeia Bedois, suku Becora, sesta (09/04). Imajen/Fb

DILI, 09 abril 2021 (TATOLI)–Prezidente  Asosiasaun Komunidade Komersiante Xineza Timor-oan (AKKXT),  Kathleen Gonçalves, hamutuk ho nia maluk sira apoia nesesidade bázika ba vítima inundasaun iha domingu (04/04).

Nia dehan, apoia ne’e mai hosi inisiativa rasik hamutuk ho nia maluk iha asosiasaun, ne’ebé asaun ne’e la’o kuaze loron-tolu ona.

“Ami apoia ba maluk vítima inundasaun iha Madre sira iha Hera, Igreja Bedois, Tasi Tolu, BTN III, inklui komunidade afetadu sira ne’ebé evakua ba João Paulo II, Manleu no Becora,”  Kathleen Gonçalves informa ba Agência TATOLI, hafoin distribuisaun sasán  ba komunidade afetada iha aldeia Bedois, suku Becora, sesta ne’e.

Sasán ne’ebé distribui kompostu hosi foos, sabonete, pasta dente, sasán dapur balun no seluk seluk tan.

“Foos ami fahe barak ona, hamutuk saka 250  no hosi totál ne’e saka 100 ami fó ba Sekretaria Estadu Protesaun Sivíl (SEPS) no saka 100 ami fó ba Avo Xanana atubele la’o fó apoia tutan ita-nia maluk afetadu inundasaun no restu iha ha’u-nia liman no agora ha’u ho maluk sira sei kontinua la’o hodi buka família vítima inundasaun hodi apoia sira,” nia haktuir.

Tuir Prezidente asosiasaun, asaun karidade hamutuk ho nia maluk sira sei kontinua ba fatin seluk ne’ebé akumula vítima dezastre naturál.

“Ita labele tur de’it iha situasaun sira hanesan ne’e, ita presiza tulun maluk sira, labele haree de’it ita-nia maluk sira monu ba susar, ita nonok hodi la tau atensaun, ida-ne’e la’ós umanu,”subliña emprezária ne’e.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here