Bee Timor-Leste, E.P nia Equipa Research Project & GIS halo assessment ba estragus ba kanalizasaun BEE MOOS iha Lakoto. Imajen/Mídia BEE Timor-Leste, E.P.

DILI, 09 abril 2021 (TATOLI)—Hafoin udan boot ne’ebé akontese iha domingu (04/04) iha Kapitál Dili, hamosu inundasaun ne’ebé estraga kanalizasaun ka kanu bee-moos nian kotu halo komunidade iha Aldeia Lemorana, Suku Dare, Postu Administrativu Vera Cruz, Munisípiu Dili, to’o agora konsumu de’it bee-mota.

Portavós Komunidade Aldeia Lemorana, Paulino de Araújo, husu ba Ministériu Obra Públika (MOP) atu hadi’a estrada asesu ba tanke bee-moos nian no halo manutensaun lalais ba kanu hirak ne’ebe estraga hosi inundasaun atu komunidade bele asesu bee-moos ho di’ak.

“Ami husu ba Governu atu halo manutensaun ba kanu bee-moos nian ne’ebé kotu total para ami bele asesu fali bee-moos. Agora daudaun komunidade konsumu de’it bee-mota. Ami husu atu grupu solidáriu ka entidade ruma ne’ebé mak bele fó apoiu urjénsia ba bee-moos. Se lae, komunidade iha ne’e bele enfrenta moras oioin hanesan kabun moras, moras infesaun vias respiratóriu no seluk tan,” Paulino de Araújo hateten liuhosi komunikadu imprensa ne’ebé Agência TATOLI asesu, sesta ne’e.

Portavós ne’e rekomenda ba Governu liuliu ba Bee Timor-Leste, E.P, tenke fornese bee-moos ba komunidade iha Aldeia Lemorana, Aldeia Terus Na’in, Ailok-Laran no iha Matadouru.

Aleinde ne’e, portavós ne’e husu ba Ministériu Obras Públika (MOP) atu urjentemente tenke normaliza mota iha Aldeia Lemorana ho lalais, nune’e bainhira udan karik mota labele lori tán komunidade nia uma.

“Bainhira atende kleur sei hamosu situasaun oin seluk ka uma barak mota sei lori tán, inklui sede aldeia no mós kapela tanba daudaun ne’e iha kondisaun grave nia-laran,” nia dehan.

Iha parte seluk, portavós ne’e husu Governu atu fornese apoiu materiál ba hela-fatin temporáriu nian hanesan tenda ka lona no materiál konstrusaun balun ne’ebé nesesáriu ba família uma-kain 10 ne’ebé lakon uma no uma-kain 53 mak sira-nia uma hetan estraga.

Jornalista: Osória Marques

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here