Administradór munísipiu Manatuto, Fernando de Sousa Junior. Imajen TATOLI/Joanico de Araújo

DILI, 09 abríl 2021 (TATOLI)–Governu liuhosi Ministériu Solidariedade no Inkluzaun (MSSI) munisípiu Manatuto apoia ona nesesidade bázika ba vítima dezastre naturál iha Manatuto Villa.

Enkuantu, apoiu ba postu administrativu seluk seidauk tanba seidauk simu dadus hosi administradór postu sira, liuliu postu afetadu hanesan postu administrativu Laklo, Soibada, Laklubar no Bariki (Natarbora).

Ba kestaun ne’e, Administradór munisípiu Manatuto, Fernando de Sousa Junior, hateten daudaun  ekipa task force rekolla ona dadus maibé deside ona katak dadus tenke mai hosi postu administrativu sira no administradór postu mak sei hato’o no bainhira MSSI munipál simu mak relata ba Governu sentrál.

“Daudaun ne’e, dadus ne’ebé iha hosi munisípiu Manatuto, postu Manatuto Villa. Enkuantu postu administrativu seluk hanesan Laklo no Laklubar ami seidauk simu tanba administradór seidauk relata mai, ami mós labele bá tanba dalan asesu laiha, maibé ami tenta kontaktu via telefónika maibé telemóvel mate tanba eletrisidade iha postu sira ne’e to’o agora seidauk lakan hikas,” Administradór Manatuto, Fernando de Sousa Junior, relata ba Agência TATOLI via telefónika, sesta ne’e.

Sasán ne’ebé ekipa task force hosi MSSI munisípiu Manatuto distribui ona ba uma-kain hamutuk 369 iha suku haat iha Manatuto Villa, kompostu hosi suku Aiteas, Ma’abat, Ailili, no Suku Sau, ne’ebé sei fó apoia hanesan ba postu seluk.

“Kuandu sira hato’o ona dadus mak hetan apoiu hanesan. Ahi eletrisidade mate dezde iha loron 03 abríl to’o agora seidauk lakan iha postu Soibada, Laklo, Lakubar, no Bariki, maibé iha Laleia lakan ona maski lakan tiha no mate filafali, nune’e de’it. Tanba ne’e maka sira seidauk informa dadus ruma mai ami no rede telefone mós laiha,” Autoridade ne’e haktuir.

Dadus provizóriu iha munisípiu Manatuto, impaktu hosi dezastre naturál ne’ebé akontese dezde loron 03 to’o 04 abríl liubá konsege estraga infraestrutura públika hanesan estrada ligadu ho postu Laklo, Laklubar, no estrada iha Bariki iha postu administrativu Natarbora.

Hosi estrada sira ne’e estragu grave liu mak ligasaun ho Laklubar tanba motorizada de’it mós labele asesu.

Aleinde ne’e, dezastre naturál estraga mós irrigasaun rua hanesan irigasaun Domi iha Manatuto Villa (kondisaun grave) inklui irrigasaun Bulutu (ladun grave) iha postu administativu Laleia.

Kona-ba eletrisidade, seidauk lakan iha postu sira ne’ebé afetadu maka’as inundasaun ne’e maibé daudaun tékniku Eletrisidade de Timor-Leste (EDTL) hadi’a ona liña distribuisaun sira  no bainhira ramata ona maka loke hikas ahi ba populasaun.

Jornalista: Antónia Gusmão

Editora: Julia Chatarina

1 KOMENTÁRIU

  1. Tanbasá maka Sr. Administradór Manatuto la koalia sai de’it ba publiku tomak katak razaun Administradór Postu Administrativu Laclo seidauk fó dadus tanba nia iha hela Dili karik? Tuir notisía hosi jornál Dili Post, foin daudauk ne’e administrador postu Laclo rasik koa’lia kona-ba estragus iha Laclo hosi capital Dili no aproveita fó mos obrigadu ba apoiu ne’ebé Maun Boot KRXG organiza atu fó ba Manatuto liuhosi Intelektuál Manatuto Anan (https://dili-post.com/xanana-mobiliza-intelektual-manatutu-anan-apoia-vitima-dezastre-520/).
    Iha Dili eletrisidade lakan hela bele ‘charge’ telefone. Sekarik Sr Administradór Manatuto dere maka nia maka la atende, ne’e tanba razaun seluk karik. La’ós tanba eletrisidade mate iha Laclo. Sr. Administradór Postu Administrativu Laclo maka bele klarifika tanbasá maka nia telefone mate maske eletrisidade iha Dili moris hela no maske povu Laclo moris iha susar laran tanba dezastre naturál ida-ne’e no presiza akompañamentu hosi autoridade lokál aas liu iha Laclo. Ha’u no mos povu Laclo nonok kleur demais ona, maibé ho dezastre naturál boot ida hanesan ne’e no terus ne’ebé dezastre ne’e lori mos ba povu Laclo, ha’u sente labele nonok ona no tenke ko’alia sai hodi defende interese povu Laclo nian hodi ejize ba Sr. Administradór Postu Administrativu Laclo atu hala’o ninia knaar ho assiduidade no responsabilidade no marka prezensa iha Postu Laclo tuir oras servisu hosi Segunda to’o Sexta hodi atende povu nia nesesidade.

HAKEREK NO HATÁN

Please enter your comment!
Please enter your name here