Arsebispu Arkidioseze Metropolitana Dili, Don Virgílio do Carmo da Silva, SDB. Imajen Tatoli/ Egas Cristóvão.

DILI, 09 abril 2021 (TATOLI)—Arsebispu Arkidioseze Metropolitna Dili, Don Virgílio do Carmo da Silva, hateten iha lansamentu ba vasina AstraZeneca ne’e nia parte hakarak simu vasina dahuluk hotu maibé tanba koko nia tensaun sa’e, entaun adia fali ba períodu tuir mai.

Maske nune’e, Don Virgílio enkoraja nafatin timoroan sira katak vasina AstraZeneca ne’e mak hanesan naroman ida ba Timor-Leste, atu hanesan rohan ida lori ema livre hosi moras COVID-19 ne’e.

Notísia Relevante: Vasina AstraZeneca hanesan asaun ikus ba prevensaun COVID-19

“Loron hirak liu ba, ha’u mós hakarak simu vasina AstraZeneca dahuluk hotu. Maibé, tanba koko ha’u-nia tensaun ne’e sa’e, entaun ha’u labele simu, sei hein fali períodu tuir mai. Maibé ha’u hanoin agora ita hetan ona vasina AstraZeneca ne’e maske dúvida sempre iha, maibé enkoraja nafatin tanba, ba ha’u, vasina ne’e mak hanesan naroman ida ba ita pelumenus atu sai hanesan rohan ba moras COVID-19 ida-ne’e,” Don Virgílio do carmo hateten ba jornalista sira hafoin simu osan hosi Reprezentante Grupu Lolo Liman ba Fuan Timor, iha Cámara Eclisiástica Lecidere, Dili, sesta ne’e.

Arsebispu ne’e hateten, loos duni informasaun ne’ebé espalla iha mídia sosiál katak vasina AstraZeneca ne’e ladi’ak, n’ebé halo ema sai dilema no tauk maibé enkoraja katak vasina ne’e di’ak tanba ema bele livre hosi COVID-19.

Don Virgílio esplika, hosi Nasaun Unida hato’o deklarasaun ba polémika ne’ebé mosu iha Uniaun Europeia katak vasina ne’e ladi’ak, entaun sira fó resposta katak buat hotu ne’ebé ema foti ne’e akuzasaun ida-ne’ebé laloos, entaun iha fatin barak kontinua fila-fali uza vasina AstraZeneca inklui Timor-Leste

“Ita-nia Governu mós molok lori vasina AstraZeneca ne’e mai to’o Timor-Leste konsulta ona liuhosi organizasaun sira espesialmente Nasaun Unida ne’ebé fó apoiu hodi konkretiza vasina ne’e iha loron hirak liuba,” nia dehan.

Don Virgílio argumenta, hanesan Primeiru-Ministru Taur Matan Ruak fó sai antes ona katak 20% populasaun Timor-Leste ne’e sei hetan vasina AstraZeneca no Primeiru Ministru mós husu ona apoiu hosi Austrália, Xina, no hein katak vasina sira seluk ne’e mai tán bele ajuda di’akliu tán.

“Liuhosi vasina, povu bele manan COVID-19. Maibé agora buat ne’ebé iha ona, ita aproveita, nune’e ita bele book-aan livre hosi virus ne’e,” Don Virgílio hateten.

Timor-Leste ofisialmente halo ona lansamentu ba vasina AstraZeneca dahuluk hodi kontra COVID-19, tuir rekomendasaun Organizasaun Mundiál Saúde nian, ne’ebé realiza iha Sentru Saúde Bairru Formosa, Dili, kuarta (07/04).

Iha lansamentu ne’e, Primeiru-Ministru Taur Matan Ruak mak simu ona vasina dahuluk ho tipu AstraZeneca, inklui Prezdente Parlamentu Nasionál Aniceto Guterres, Laureadu Prémiu Nobel da Paz José Ramos Horta, membru parlamentu no membru Governu balun, no membru Sala Situasaun Sentru Integradu Jestaun Krize (CIGC, sigla portugés).

Notísia Relevante: PM Taur simu ona vasina dahuluk

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here