BTL, E.P fornese bee-moos ba Komunidade iha Kintal Bot, ho Mobile Tank, ne’ebé atendimento ne hala’o tamba estasaun distribuisaun iha Mascareñas ne’ebé fornese bee iha área Kintal Boot, Kintal kiik, Santa Cruz, Audian, Bemori no Mascareñas avaria kauza hosi inundasaun. Imajen/BTL

DILI, 09 abríl 2021 (TATOLI)–Governu liuhosi Bee Timor-Leste, Empreza Públiku (BTL,E.P) hahú lansa ona númeru  kontaktu disponível atu abitante afetadu inundasaun iha kapitál Dili bainhira presiza bee-moos bele kontaktu.

“Ami lansa ona númeru kontaktu ba públiku, liuliu komunidade sira ne’ebé presiza bee, bele kontaktu (+670) 77326859 atu ekipa sira lori bee ba iha área ne’ebé presiza hodi bele kuru atu nesesita uma  laran,” Prezidente Konsellu Administrasaun BTL, E.P, Carlos Peloi dos Reis  hateten iha edifísiu Ministériu Finansa (MF) Aitarak-Laran Dili, sesta ne’e.

Notísia relevante: BTL, E.P kálkulu kustu estragu sistema bee hamutuk millaun $2,5

Nune’e, nia husu ba komunidade sira atu halo kontaktu ba númeru telefone ne’ebé lansa ona ba públiku atubele atende nesesidade urjente.

“Komuidade sira bainhira presiza bee, bele kontaktu ami atu ami bele hatene fatin ida ne’e presiza bee no ami bele lori tanke no instala bee,” nia tenik.

Daudaun ne’e, empreza estatál  koopera ho parseiru dezenvolvimentu sira liuliu United Nations International Children’s Emergency Fund (UNICEF), FALINTIL-Forsa Defeza Timor-Leste (F-FDTL) no seluk tan, halo esforsu hela halo instalasaun bee tanke kuaze iha kapitál Dili laran no sorin seluk enkuantu hein instalasaun sistema distribuisaun ne’ebé a’at, ekipa tun ba terrenu hodi disponibiliza bee ba abitante afetadu.

BTL disponível númeru kontaktu tanba abitante iha kapitál Dili kuaze afetadu inundasaun no la asesu bee, tanba ne’e liuhosi númeru kontaktu bele husu informasaun no husu lori bee ba fatin.

“Área ne’ebé ami seidauk konsege instala tanke, bele liga no haruka karreta lori bee ba atu komunidade sira bele kuru,” nia akresenta.

Prezidente BTL, rekoñese labele responde hotu tanba abitante iha Dili laran tomak afetadu hotu no kapasidade atu responde mós natoon hela, tanba ne’e presiza serbisu maka’as atu rekupera hikas situasaun.

“Ami konsege lori bee ba dala-rua no tolu ba abitante balun ne’ebé presiza, maibé balun seidauk depende ba skala nesesidade, maski nune’e ami kontinua esforsu atu instala tanke masa iha fatin hotu atu komunidade bele asesu bee,” nia hatutan.

Jornalista Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here