Apoiu umanitária hoi AITL ne’ebé entrega ba Vise-Ministru Interiór, António Armindu, sesta (09/04), iha edifísiu Ministériu Interiór, Vila-Verde, Dili. Imajen/Mídia MI

DILI, 09 abríl 2021 (TATOLI)-Asosiasaun Importadór Timor-Leste (AITL), sesta ne’e, fó apoiu umanitária ba vítima dezastre naturál liuhosi Ministériu Interiór. Nune’e mós Parseria Humanitarian Australia (AHP-sigla inglés) fó mós apoiu nesesidade báziku ba vítima dezastre naturál liuhosi Sekretária Estadu Protesaun Sivíl (SEPS).

Notísia Relevante : Don Virgílio: Traballadór Timoroan iha Austrália tulun vítima dezastre naturál

Konsórsiu ONG sira hosi AHP hanesan CARE Internasionál iha Timor-Leste, Caritas Australia, Oxfam, World Vision no Plan International fó mós apoiu umanitáriu liuhosi SEPS. Imajen/Care International

Reprezentante  AITL, Sigit R. entrega diretamente apoiu nesesidade bázika hirak ne’e ba Vise-Ministru Interiór, António Armindo, ne’ebé akompaña mós hosi kargu xefia sira iha edifísiu Ministériu Interiór Vila-Verde, Dili.

Apoiu umanitária ne’ebé AITL entrega maka  hanesan, foos marka AAA saka 100, mina sania kaixa haat (4), white coffee kaixa 25, Susu bubuk Vidorant smart kaixa 100 no supermi kaixa 100.

Vise-Ministru Interiór, António Armindo, hateten apoiu hirak-ne’e sei distribui ba Polísia Nasionál Timor-Leste (PNTL) no mós ba abitante sira iha área ne’ebé izoladu hosi estrada públiku tanba kauza hosi dezastre naturál, domingu (04/04/2021).

“Asosiasaun Importadór Timor-Leste, hato’o sira-nia solidariedade ba Governu ligadu ho dezastre naturál ne’ebé akontese iha ita-nia rain. Apoiu ne’e ita sei distribui ba vítima afetadu inundasaun ne’ebé akontese iha semana kotuk, no ita sei hahú fahe ba PNTL ho komunidade sira evakua hosi sira-nia hela fatin,” António Armindo hateten.

Hosi sorin seluk, Ajénsia Nasoins Unida nian sira, Parseria Humanitarian Australia nian ho nia parseiru sira, apoiu Governu liuhosi SEPS hodi responde no distribui apoiu umanitária ne’e ba família afetadu dezastre naturál iha territóriu nasionál.

Konsórsiu ONG sira hosi AHP nian maka hanesan CARE Internasionál iha Timor-Leste, Caritas Australia, Oxfam, World Vision no Plan International.

Konsórsiu ne’e oferese  ajuda sira hanesan kolesaun 100, lona 100, manta 1.000, material dapur nian set 190, pakote ijiene 200, lixu fatin 30, estasaun fase-liman 30, spanduk hamriik nian ho mensajen kona-ba prevensaun COVID-19 hamutuk 30 no sabaun/sabonete hamutuk kaixa 15 (2160 unidade mak iha laran) ne’ebé finansia hosi Governu Australia.

Diretór CARE internasionál iha Timor-Leste, Peter Goodfellow, hanesan parseiru ba Estadu Timor-Leste preokupa mós situasaun kritiku ne’ebé povu Timor-Leste enfrenta iha dezastre naturál ne’e.

“Ida ne’e krítiku tebes atu ita konsidera nesesidade feto no labarik sira nian no ema ho defisiénsia, hanesan ita hatene hosi esperiénsia katak grupu hirak ne’e mak presiza liu atensaun extra iha etapa sira dahuluk iha emerjénsia ida,” Peter Goodfellow hateten.

Iha fatin hanesan Embaixadór Australia iha Timor-Leste, Peter Roberts, hateten  kondisaun difisil ida-ne’e Parseria Humanitarian Australia nian imediatamente iha terrenu, fornese apoiu esensiál ba hirak ne’ebé temporariamante hela iha sentru evakuasaun sira.

Sekretáriu Estadu SEPS, Joaquim José Gusmão dos Reis Martins, afirma katak ho inundasaun akontese rezulta estragu signifikativu ba komunidade nia uma no infrastrutura públiku sira.

Abitante liu na’in-10.000 mak evakua ona ba sentru evakuasaun dezignadu sira hamutuk 19. Nune’e, SEPS Joaquim Gusmão, hato’o sinseru gratidaun ba apoiu ne’ebé fó ona hosi Embaixada Australia liuhosi parseria konsórsiu humanitarian nian no hein katak apoiu hirak ne’e bele hakmaan komunidade sira nia taterus relasiona ho inundasaun boot ida-ne’e.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here