Espoza Prezidente Repúblika, Cidália Nobre Lopes Mouzinho Guterres, entrega manda ba vítima dezastre naturál iha sentru evakuasaun. Imajen/Mídia PR

DILI, 08 abril 2021 (TATOLI)—Espoza Prezidente Repúblika, Cidália Nobre Lopes Mouzinho Guterres, no Xefe Kaza Sivíl (CCC, sigla portugés) Francisco Maria de Vasconcelos, horisehik (kuarta, 07/04), kontinua hala’o asaun apoiu umanitáriu hosi Prezidente Repúblika ba vítima dezastre naturál ne’ebé afetadu hosi inundasaun iha Kapital Dili no Hera.

Koordenadór sentru evakuasaun Grupu II João Paulo II Aldeia 12 de Outobru, Suku Comoro, Postu Administrativu Don Aleixo, Laurentino Martins, apresia ba tulun ne’ebé mak sira hetan hosi Prezidente Repúblika nia espoza, tanba apoiu hirak ne’e bele sustenta ona sira-nia moris.

“Ami apresia ho apoiu umanitáriu ne’ebé ita-nia Prezidente Repúblika oferese ba ami nu’udar povu afetadu. Ami nafatin agradese tulun boot ne’ebé ami hetan, nune’e bele responde no sustenta ami família lubuk ida hela hamutuk (iha Bairru Joao Paulo II) nia nesesidade,” Laurentino Martins hateten liuhosi komunikadu imprensa ne’ebé Agência TATOLI asesu, kinta ne’e.

Entretantu, vítima dezastre natural ne’ebé evakua no refujia iha sentru evakuasaun iha Aldeia Mota Kiik, Hera, Rosito Braga, hato’o agradesimentu ba Espoza Prezidente Repúblika no Xefe Kaza Sivíl ho nia komitiva ne’ebé solidariza hodi fó apoiu umanitariu ba vítima dezastre naturál.

“Ami orgullu no kontente ba vizita. Ami famiíia afetadu agradese ba sasán ne’ebé mak lori mai fó apoiu ami. Ida-ne’e hanesan valór boot ba ami komunidade,” Rosito Braga hateten.

Hafoin fahe apoiu umanitária ne’e, Xefe Kaza Sivíl Francisco Maria de Vasconcelos hateten, apoiu umanitáriu ne’ebé hala’o ne’e nuudar jestu solidariedade hosi Prezidente Repúblika, Francisco Guterres Lú Olo, ba nia povu sira-ne’ebé afeta makaas ba dezastre naturál.

Xefe Kaza Sivíl (CCC, sigla portugés) Francisco Maria de Vasconcelos, entrega foos saka id aba vítima dezastre naturál iha sentru evakuasaun. Imajen/Mídia PR.

“Prezidente hakarak espresa nia solidariedade no hakarak apoia ba populasaun ne’ebé afetadu ba dezastre naturál. Ida-ne’e mak realidade katak, Prezidente Repúblika tau matan ba nia povu sira. Fatin barak-barak ne’ebé ami ba horisehik ho ohin ba vizita ne’e maioria presiza biti, sumasu, manta, bee- moos, bee ba haris fatin no ahi. Ita espera katak Governu bele responde, tanba ita hotu hatene katak inundasaun ne’e akontese iha fatin barak,” Francisco Maria de Vasconcelos hateten.

Iha biban hanesan, Espoza Prezidente Repúblika, Cidália Nobre Lopes Mouzinho Guterres, fo korajen nafatin ba vítima sira atu hasoru situasaun kalamidade dezastre naturál ne’ebé mak afeta makaas tebes.

Espoza Prezidente hato’o agradesimentu ba timoroan sira-ne’ebé mak sai responsavel, servisu makaas hodi tau matan ba vítima sira-ne’ebé afetadu ba inundasaun, ne’ebé hela iha fatin provizóriu hanesan iha igreja, eskola, no edifísiu instituisaun Estadu. Aleinde ne’e, agradese mós ba timoroan sira iha rai-laran ka rai-li’ur, individu ka grupu, organizasaun sosiedade sivil, empreza, ajénsia internasionál ne’ebé apoiu ona vítima sira.

Parseiru sira-ne’ebé akompaña Ezpoza Prezidente Repúblika iha atividade distribuisaun sasán ba apoiu umanitária ne’e mak Plan Internasionál, Rede-Feto no Fundasaun Sadia.

Sentru evakuasaun sira-ne’ebé mak espoza Prezidente Repúblika hala’o ona vizita mak sentru evakuasaun Igreja Bidau Mota Klaran, hodi fó apoiu ba família uma-kain 42 ho totál populasaun 82, ho nesesidade hanesan Manta 2), biti hamutuk 25, Xá dos lima (5), supermie kaixa 20, foos saka 15, biskuit kaixa-10, country jus dos neen (6), indomilk dos neen (6), masin-midar, mina dos lima (5)

Sentru evakuasaun Patrimonio Estadu Bairo Joao Paulo II iha totál uma-kain 96 no populasaun kuaze-500 ne’ebé hetan apoiu foos saka 45, supermie dos 30, contry jus dos 10, indomilk dos-10, mina dos lima (5), biskuit dos 14, masin dos haat (4), masin-midar plastiku 30, xá dos 10, manta 50, biti 20, energen dos 10 no caban dos lima (5).

Iha sentru evakuasaun Bairru Maslidun Tasi Tolu, konsege fahe energen dos 10, supermie dos 20, masin dos 10, caban dos 10, indomilk kaixa 10, jus dos lima (5), mina dos lima (5), masin midar, xa dos 10, foos saka 25, biskuit dos 10, Daia dos 10, eskova dos lima (5), pepsodent dos lima (5).

Sentru evakuasaun Santa Bakhita Hera, espoza Prezidente Repúblika fó apoiu ba vítima dezastre naturál ho foos saka 20, supermie 20, biti 40, manta 40, mina dos neen (6), indomilk no jus dos 15, masin dos lima (5), sabaun dos 10, masin-midar karon ida (1), xá dos lima (5), biskuit dos 10, Daia dos 10, eskova ho pepsodent dos 10, no energen dos 10.

Iha sentru evakuasaun Hera parte SD Eis Brimob nian, konsege fahe foos saka-20, supermie kaixa 20, manta ho biti hamutuk 40, mina dos lima (5), indomilk ho jus dos 30, masin dos lima (5), sabaun kaixa 20, masin-midar saka rua (2), biskuit kaixa 20, Daia 20, eskova no pastadente kaixa 10 no energen kaixa 20.

Relasiona ho be-dalan ka barajen hodi satan mota iha parte Hera ne’ebé iha tempu inundasaun estraga komunidade nia uma barak no balun nia uma mota sobu totál, Xefe kaza Sivíl Civil simu ona dadus no sei hato’o ba Prezidente Repúblika hodi komunika ho Governu.

Alende ne’e, Xefe Kaza Sivíl hateten, Prezidénsia Repúblika sei koordena ho Ministériu Obras Públika (MOP) hodi hadi’ak be-dalan ka barajen hodi satan-mota, nune’e bainhira hadi’a fila-fali uma, labele hetan nafatin dezastre naturál.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here