Serimónia entrega ai-han ba universitáriu-sira iha UNTL, Liceu. Imajen/Média MTKI.

DILI, 08 abríl 2021 (TATOLI)—Universitáriu na’in 250 hosi Universidade Nasionál Timor Lorosa’e (UNTL), Universidade da Paz (UNPAZ) no Universidade Dili (UNDIL), hetan apoiu fós no super mie hosi Ministériu Turízmu Indústria no Komérsiu (MTKI).

Aniversitáriu hirak-ne’e afeitadu hosi inundasaun iha kost ne’ebé sira hela, no oras ne’e daudaun refujia iha edifísiu Fakuldade Ekonomia UNTL, Liceu.

Notísia relevante:MTKI husu públiku labele pániku, foos sufisiente ba konsumu nasionál

Ministru Turízmu Indústria no Komérsiu, José Lucas do Carmo da Silva, hateten apoiu ne’ebé Ministériu fornese maski kuantidade ki’ik, maibe hakarak hakmaan situasuan difísil ne’ebé estudante-sira enfrenta.

“Sasan ne’ebé ha’u lori maski kuantidae ki’ik, maibé hakarak hamutuk ho imi atu hakamaan todan ne’ebé imi hasoru,” José Lucas do Carmo da Silva, hateten ba estudante sira, kinta ne’e.

Governante ne’e dehan, situasaun difísil ne’ebé família barak inklui estudante-sira enfrenta sai preokupasaun Governu-nian, no Governu rasik iha obrigasaun atu fó atensaun hodi fó nafatin esperansa iha situasaun ne’e.

Apoiu ne’ebé MTKI oferese ba estudante-sira mak hanesan super mie kaixa 43 no fós saka 43.

Serimónia entrega ai-han hosi Ministru MTKI hetan mós akompañamentu hosi Reitór UNTL ho ninia estrutura.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here