Joven sira ajuda falun hahan iha Restaurante Uma Lafatik, Mandaein hodi distribui ba fatin refujiadu balun iha Dili. Imajen/Uma Lafatik

DILI, 08 abríl 2021 (TATOLI)Udan ho intensidade boot no provoka inundasaun iha domingu (04/04) kuaze afeta ba territóriu tomak, halo ema barak nia hela fatin hetan estragu maka’as, obrigadu vítima sira evakua ba fatin evakuasaun provizóriu, liu-liu iha kapitál Dili ne’ebé hetan impaktu maka’as.

Haree ba situasaun ne’e, timor-oan barak mak fó ajuda umanitária hanesan ai-han no nesesidade bázika seluk ne’ebé vítima dizastre naturál sira presiza.

Na’in ba Restaurante Uma Lafatik, Francisca Freitas, hateten, hafoin dizastre naturál, nia ho inisiativa rasik hamutuk ho maluk voluntáriu sira hamutuk na’in-20, prepara ai-han gratuita hodi transporta ba fatin refujiadu.

“Iha loron dahuluk, ami oferese 458 kotak, loron daruak 886, horiseik konsege atije 1.000-resin no ohin loron ne’e ami iha planu oferese 2.000,” Francisca Freitas dehan ba Agência TATOLI, iha Uma Lafatik, Mandarin, kinta ne’e.

Notísia relevante: La presiza ta’uk, monu hamriik fali

Ai-han oferese ba maluk vítima sira iha edifísiu, Cruz Vermelha de Timor-Leste (CVTL), Liceu, INFODEPE no Hera.

“Horiseik ami kontinua nafatin iha Manleu, Tasi Tolu no Metiaut, tanba iha ne’eba mós akumula vítima inundasaun barak,” nia akresenta.

Iha fatin balun ne’ebé maka akumula vítima inundasaun na’in-15 to’o 50, Uma Lafatik kontaktu atu foti diretamente, enkuantu vítima sira ne’ebé hela iha Don Bosco maka la konsege apoia.

Joven sira ajuda falun hahan iha Restaurante Uma Lafatik, Mandaein hodi distribui ba fatin refujiadu balun iha Dili. Imajen/Uma Lafatik

“Ami la apoia ba Don Bosco tanba sira barak no hetan ona apoia hosi organizasaun balun. Ami só apoia tuir ami-nia kapsidade no ami lolo liman to’o,” nia hatutan.

Francisca Freitas haktuir, ai-han sira ne’ebé maka Uma Lafatik tein, mai hosi apoia joven sira mak halibur hamutuk.

“Bainhira ha’u halo asaun ne’e no tau iha rede sosiál, viziñu sira lori foos no bee hodi apoiu asaun ida ne’e. Ha’u mós hetan fundu iha loron hirak liubá hosi ha’u-nia kolega sira hodi apoia ha’u-nia atividade ne’e,” nia informa.

Jornalista: Natalino Costa

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here