Arguidu António da Conceição "Kalohan" ho nia kompañeru sira iha TDD. Imajen Tatoli/Nelson de Sousa

DILI, 08 abríl 2021 (TATOLI)-Tribunál Distritál Dili (TDD), adia julgamentu hasoru arguidu António da Conceição ‘’Kalohan’’ atuál membru Parlamentu Nasional (PN) tanba kumprimenta ba regra serka sanitária no konfinamentu domisiliáriu iha kapitál Dili.

Notísia Relevante : António “Kalohan” ba ona hatán Tribunál

Tribunál  Distritál Dili notifika arguidu/a na’in-lima (5) ho inisiál ADC, JIB, GPSC, nu’udar kargu xefia iha Ministériu Komérsiu Indústria no Ambiente (MCIA), PMCSV nu’udar diretór hosi kompañia privada ida no arguidu António da Conceição “Kalohan” nu’udar eis Ministru MCIA iha 2014.

Juis titulár Ivan Suritai, hateten prosesu julgamentu ne’e labele hala’o tanba daudaun iha hela implementasaun serka sanitária hodi evita halibur malu barak.

Nia dehan, tuir despaxu Tribunál Rekursu (TR) liuhosi Diretivu Konsellu Superior Judisiál  katak durante serka sanitária Tribunál atende de’it kazu sira ho karakter urjénsia no kazu kontinuasaun sira ne’ebé asegura atu prova labele lakon, nune’e durante iha marsu to’o daudaun iha serka sanitária ne’e Tribunál adia mós julgamentu ne’ebé marka ona labele kontinua.

“Prosesu ida ne’e, adia fila-fali julgamentu ba iha loron 23 setembru 2021, tuku 09:00 dadeer no kontinua fali iha parte loraik atu rona arguidu ho sasin sira,” Juis Ivan Suritai pronunsia iha sala audiénsia TDD.

Ivan Suritai, hateten razaun Tribunál marka fali julgamentu ne’e ba fulan setembru tanba posibilidade iha fulan maiu bele serka sanitária kontinua no tama ba iha agostu komesa ferias judisiál.

Nia  esplika kona-ba entendimentu Tribunál nian ba iha karta pedidu ne’ebé haruka hosi Parlamentu Nasionál (PN) mai Tribunál kona-ba imunidade António da Conceição nian mezmu julgamentu ne’e adia, maibé admite sei válidu nafatin bainhira julgamentu tuir mai António da Conceição bele marka prezensa no la presiza halo tan levantamentu imunidade hosi PN rasik.

Advogadu privadu, José Pedro Camões, ne’ebé fó asisténsia legál ba António da Conceição “Kalohan”, hateten levantamentu imunidade António da Conceição nian PN hasai ona ho parsialmente singnifika la totál tanba ne’e iha prátika imunidade ne’e hasai ona Tribunál bele halo julgamentu.

Nia hateten, parte defeza kumpre prosesu ne’e Tribunál adia tanba serka sanitária no Tribunál entende prosesu kazu ne’e iha kompleksidade.

Jornalista       : Nelson de Sousa

Editór             : Francisco Simões

HAKEREK NO HATÁN

Please enter your comment!
Please enter your name here