Sekretáriu Estadu Komunikasaun Sosiál, Merício Juvinal dos Reis ‘Akara’. Imajen TATOLI/Egas Cristóvão

DILI, 08 abríl 2021 (TATOLI)–Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, durante ne’e fornese informasaun kredível liuhosi pájina rede sosiál nune’e komunidade labele pániku iha situasaun atuál.

“Iha situasaun sira hanesan  ne’e, ema balun hakarak lansa informasaun falsu ka hoax atu halo pániku liután, halo situasaun la hakmatek no halo ema konfuzaun. Tanba ne’e knaar SEKOMS nia mak atu haloos informasaun no organiza informasaun hodi informasaun maihosi odamatan ida no informasaun sai la sala,” Sekretáriu Estadu Akara hateten ba Agência TATOLI, iha Palásiu Governu, kinta ne’e.

Tuir nia, SEKOMS iha knaar prinsipál atu divulga no fasilita informasaun ba públiku atubele akompaña nafatin liuhosi meiu komunikasaun ne’ebé iha, ba situasaun atuál liga ba COVID-19 no dezastre naturál.

Tanba ne’e, liga ba COVID-19, SEKOMS  hahú koopera ho  Sala Situasaun-Sentru Integradu Jestaun Krize (CIGC, sigla portugés)  no Ministáriu Saúde (MS),  enkuantu liga ba dezastre naturál halo kolaborasaun ho Sekretaria Estadu Protesaun Sivíl (SEPS), Ministériu Solidaridade Sosiál no Inklusaun (MSSI), Ministériu Obra Públika (MOP), Institutu Jestaun Ekipamentu (IGE, sigla portugés) atu fahe informasaun kredível nune’e públiku labele dúvida no kontinua akompaña.

“Husu ba públiku atu kontinua fiar informasaun ne’ebé liuhosi fontes kredível sira ne’ebé liga ba situasaun COVID-19, fiar maka informasaun ne’ebé liuhosi Sentru Integradu Jestaun Krize no inundasaun fiar de’it fontes hosi Sekretaria Estadu Protesaun Sivíl lae Portál Governu,” nia akresenta.

Daudaun ne’e, SEKOMS  serbisu hamutuk ho Televisaun Edukasaun Timor hodi halo transmisaun direta no konvida fontes kredível no atualiza informasaun COVID-19 inklui inundasaun, nune’e públiku  bele kontinua informasaun ho di’ak no labele pániku.

 Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here