DILI, 08 abríl 2021 (TATOLI) – Sekretáriu Estadu Juventude no Desportu (SEJD) agradese ba inisiativa grupu juventude sira ne’ebé oferese-an hodi hala’o limpeza jerál iha área kapitál Dili, kinta ne’e.
“Ita agradese ba asaun juventude ne’e hodi ajuda problema boot ne’ebé ita-nia rain enfrenta iha situasaun dezastre naturál no COVID-19. Juventude sira-nia kontribuisaun ajuda hamoos tahu-dodok no fo’er iha área afetadu sira iha kapitál Dili importante tebes,” SEJD Abrão Saldanha hateten ba jornalista iha edifísiu SEJD, Lecidere, Dili.
Governu konsidera inisiativa joven hodi hamoos fo’er no suru sai rai-henek no fatuk sira ne’ebé taka metin iha baleta no ezgotu sira importante atu ajuda normaliza bee-dalan Dili sira.
Hahú segunda (05/04), SEJD harii ona Posku Asaun Juventude (PAJ) hodi kontinua halo limpeza iha área estrada Balide, Aitarak-Laran, Delta III, Largo Lecidere, Palásiu Governu, Motael no fatin seluk tan.
Juventude sira ne’ebé voluntáriu Posku Asaun Juventude (PAJ) envolve mós Grupu Juventude hosi Organizasaun Arte Marsiál Persaudaraan Setia Hati Terate (PSHT), Ikatan Keluarga Silat Putra Timor-Leste (IKS.PTL) Kara Sakti, Kmanek Oan Rai Klaran (KORK) no arte rituál Sete-Sete (77), hodi kontribui hamoos fo’er iha kapitál Dili no buka apoia vítima sira ne’ebé lakon to’o ohin loron seidauk hetan.
Parseiru sira ne’ebé hola parte iha PAJ 100-liu ne’e kompostu hosi Joven Hadomi Natureza (JHN), Asosiasaun Parlamentu Foin-Sa’e Timor-Leste (APFTL), Uniaun Nasional Eskuteiru Timor-Leste (UNETL), Konsellu Nasional Juventude Timor-Leste (CNJTL), Cruz Vermella Timor-Leste (CVTL), Asosiasaun Defisiénsia Timor-Leste (ADTL), Estudante Hadomi Natureza Universidade Nasionál Timor Lorosa’e (ESHANA-UNTL), Comoro Child and Youth Center (CCYC), Aliansa Nasional Kontrolu Tabaku (ANCT), Sentru Juventude Becora no mós Ekipa Juventude no Estudante Apoiu Umanitária (EJEAU).
Jornalista : Eugénio Pereira
Editór : Francisco Simões
