Atividade iha merkadu fa'an katupa iha Loes, Liquiça iha tempu sira liubá molok serka sanitária iha Dili. Imajen/Notes on Travelling

LIQUIÇA, 08 abríl 2021 (TATOLI)-Negosiante sira ne’ebé fa’an katupa iha Loes, Munisípiu Liquiça nian, triste no halerik tanba besik fulan-rua ona la hetan rendimentu ho situasaun serka sanitaria no konfinamentu domisiliáriu iha kapitál Dili.

Notísia Relevate : Atividade Negósiu iha Loes ho Atabae Taka Provizóriu

Iha loron baibain, molok pandemia COVID-19  no konfinamentu obrigatóriu iha kapitál Dili, movimentu hosi Dili mai Batugade no liubá Bobonaro sempre liuhosi Loes hodi sosa katupa no na’an tunu ka batar-da’an sira.

“Agora ami la hetan liu osan tanba ema nunka hola ami nia sasán. Uluk loron-ida, ami bele hetan to’o $200, mais agora hetan $1 de’it mós susar tebes,”  Martina Moniz, negosiante katupa iha Loes, hateten ba Agência Tatoli, foin lalais ne’e.

Nia hateten, laiha rendimentu ne’e difikulta tebes atu halibur osan hodi kumprimenta ba obrigasaun selu kréditu hosi Moris Rasik no Tubarai. Tanba maioria negosiante sira halo negósiu ba empresta ka kréditu osan hosi instituisaun finanseira rua-ne’e.

“Ami hotu iha ne’e kréditu osan hosi Moris Rasik ho Tubarai, tanba ne’e, bainhira laiha rendimentu, ami susar atu bele kumprimenta ba devolve osan ne’ebé ami tenke hatama fulan-fulan ba Moris Rasik ho Tubarai,” Martina Moniz hateten.

Tuir observasaun Agência Tatoli nian durante oras balun iha fatin fa’an katupa iha Loes nian, laiha duni abitante ka kompradór maka ba sosa katupa sira, ikan tunu, na’an tunu, batar da’an ho seluk-seluk tan.

Jornalista        : Hortencio Sanchez

Editór              : Francisco Simões

HAKEREK NO HATÁN

Please enter your comment!
Please enter your name here