Serimónia lansamentu distribuisaun ai-moruk AstraZeneca ba Munisípiu-sira iha edifísiu SAMES, (08/04/21). Imajen Tatoli/António Gonçalves.

DILI, 08 abríl 2021 (TATOLI)—Ministériu Saúde (MS) hahú distribui vasina COVID-19 ho tipu AstraZeneca ba munisípiu neen, ho lansamentu ofisiál ne’ebé hala’o iha edifísiu Serbisu Autónomu Medikamentu no Ekipamentu Saúde (SAMES), Kampung Alor, kinta ne’e.

Munisípiu neen ne’ebé MS distribui uluk mak hanesan, Baucau, Lautém, Bobonaro, Ainaro, Covalima no Liquiça.

Notísia relevante:AstraZeneca doses 24.000 to’o ona TL

“Aban ita sei distribui tan ba Munisípiu-sira seluk. Tanba vasina COVID-19 laiha diferensa ho vasina-sira seluk ne’ebé durante ne’e ita distribui hela, ita tau iha temperatura grau sélsiu 2 to’o 8,” Ministra Saúde,  Odete Maria Freitas Belo, hateten iha serimónia lansamentu distribuisaun iha SAMES, kinta ne’e.

Tanba ne’e, Odete Belo husu ba kondutór-sira atu halai ho velosidade neneik, tanba  situasaun inundasaun  halo rai monu, estrada aat nune’e ai-moruk sira-ne’e bele to’o fatin destinasaun ho kompletu tuir númeru kuantidade ne’ebé Governu fahe ona.

Iha fatin hanesan, Diretór Ezekutivu SAMES, Santana Martins, hateten distribuisaun vasinasaun doses ba iha Serbisu Saúde Munisípal-sira atu atende uluk ba iha  liña frente-sira.

Tuir tabela distribuisaun hosi SAMES ba AstraZeneca doses 24.000 ne’e mak hanesan, Munisípiu Aileu hetan doses 590, Ainaro 690, Baucau 1.730, Boboanro 1.080, Covalima 920, Dili 13.190, Ermera 900, Lautem 740, Liquiça 620, Manatutu 590, Manufahi 680, Viqueuqe 910 no RAEOA 1.360.

Tuir planu, aban (09/04/21) Governu sei kontinua distribui ba munisípiu sira ne’ebé ohin seidauk hetan.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here