Ministru Ensinu Superiór, Siénsia no Kultura, Longuinhos dos Santos. Imajen Tatoli/Egas Cristovão.

DILI, 08 abríl 2021 (TATOLI)—Ministériu Ensinu Superiór Siénsia no Kultura (MESSK), seidauk simu lista universitáriu hosi Instituisaun Ensinu Superiór Privadu no Públiku (IESPP), ne’ebé hakarak fila ba Munisípiu.

“To’o agora seidauk iha dirijente universidade ida mak entrega lista mai MESSK. Ita hein tan to’o aban hanesan loron ikus. Bainhira iha duni lista estudante balun mak hakarak ba Munisípiu, ita sei aselera prosesu teste swab,” Ministru Longuinhos dos Santos, hateten ba jornalista Agência Tatoli, hafoin reuniaun Konsellu Ministru (KM), kinta ne’e.

Notísia relevante:Universitáriu ne’ebé fila ba Munisípiu tenke koopera atu teste swab

Governante ne’e hatutan, MESSK kontinua hein to’o 09 abríl no bainhira laiha duni lista ne’ebé tama, signifika laiha universitáriu ida mak hakarak ba Munisípiu.

Nia esplika, objetivu hosi aprezentasaun lista ne’e tanba MESSK hakarak atu molok dezloka ba Munisípiu, tenke halo teste swab nune’e prevene moras COVID-19 labele da’et ba Munisípiu.

“Ida ne’e mak prosesu, hakarak asegura-malu ita tenki kumpre protokolu Organizasaun Mundiál Saúde (OMS) no Ministériu Saúde (MS),” nia subliña.

Antes ne’e MESSK fó dateline ba universidade-sira atu aprezenta lista kona-bá universitáriu ne’ebé hakarak ba Munisípu, tenke submete to’o tuku 17:00 loron 09 abríl.

Mekanizmu atu haruka lista universitáriu-sira MESSK mós husu atu universidade-sira bele submete liuhosi online, bele mós haruka direta ba ekipa tékniku Dirasaun Jerál Ensinu Superiór nian.

Jornalista: Tomé Amado

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here