Ministru Ensinu Superiór, Siénsia no Kultura, Longuinhos dos Santos, partisipa iha serimónia ba komemorasaun Loron Mundiál Saúde no simu doze ba dahuluk hosi vasina COVID-19. Imajen/Média MESSK.

DILI, 08 abríl 2021 (TATOLI)—Ministru Ensinu Superiór Siénsia no Kultura (MESSK) Longuinhos dos Santos senti di’ak no hakmatek, hafoin simu vasina AstraZeneca.

“Ha’u simu tiha vasina ne’e sente di’ak no hakmatek loos.  Ha’u iha ona imunidade atu bele kontra COVID-19,” Ministru Longuinhos hateten ba jornalista Agência Tatoli, hafoin simu vasina iha Sentru Saúde Formoza (SSF), kuarta ne’e.

Notísia relevante:Vasina AstraZeneca hanesan asaun ikus ba prevensaun COVID-19

MESSK konsidera vasina ne’e seiduk garante 100 % atu ema hotu livre hosi COVID-19, maibé bele garante ona katak, bele iha imunidade forte hodi kontra virus ne’e.

Tanba ne’e, hanesan membru Governu Loguinhos iha obrigasaun atu hatudu dalan ne’ebé di’ak ba povu hodi garante katak, ho vasina de’it mak sei hasees Timoroan hotu hosi virus ida-ne’e.

Entretantu, vasinasaun AstraZeneca kontra COVID-19 ofisialmente lansa iha ámbitu serimónia komemorasaun Loron Mundiál Saúde  no Primeiru-Ministru (PM), Taur Matan Ruak, mak ema dahuluk ne’ebé simu vasina ne’e.

Aleinde ne’e, Prezidente Parlamentu Nasionál (PPN), Aniceto Guterres, Premiadu Nobel da Paz, José Ramos Horta, membru Parlamentu Nasionál no membru Governu balun, inklui membru Sala Situasaun-Sentru Integradu Jestaun Krize (CIGC, sigla portugés).

Iha faze dahuluk vasina sei kobre populasaun 8%, ne’ebé 3% korresponde ba traballadór liña frente, liuliu funsionáriu sira ne’ebé serbisu iha unidade kuarentena no izolamentu, ka iha postu entrada hanesan aeroportu, portu no terrestre, no 5% sei abranje ba populasaun ne’ebé hela iha área besik fronteira terrestre no ema sira ne’ebé konsidera risku ba kontaminasaun.

Iha faze daruak, sei abranje populasaun 12%, inklui sidadaun sira ne’ebé ho idade 60, liuliu sira ne’ebé hela iha Rejiaun Administrativa Espesiál Oé-cusse Ambeno (RAEOA), iha Dili, Covalima no Bobonaro.

Aleinde ne’e, iha faze daruak sei abranje mós, profisionál saúde, profesór, pesoál restaurasaun, loja no merkadu sira, pesoál konfisaun relijioza sira, no líder komunitáriu no polítiku sira ne’ebé hela iha RAEOA, Dili, Covalima, no Bobonaro.

Grupu sira ne’ebé integra iha faze datoluk hamutuk 80% populasaun ne’ebé hela iha Timor-Leste, ne’ebé sei define konstante ba evolusaun klíniku nasionál sira no ritmu fornesimentu vasina.

Vasina ne’e sei efetua iha estabelesimentu Servisu Nasionál Saúde, ne’ebé sei aloka ekipa treinada vasinasaun sira, hodi haree espesifikasaun vasina kontra COVID-19.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here