Ekipa saúde konsola hela JdSNB iha ninia rezidénsia (28/03/21). Imajen Tatoli.

DILI, 08 abríl 2021 (TATOLI)—Pasiente ho inisiál JdSNB ne’ebé kumpre izolamentu durante loron 10 hafoin detetadu pozitivu COVID-19 iha 26 marsu, livre ona iha 6 abríl ho rezultadu negativu iha teste daruak, ne’ebé hala’o iha 5 abríl tinan ne’e.

“Pasiente JdSNB hala’o teste swab iha 26 marsu ho rezultadu pozitivu no izola an durante loron 10. Repete swab iha 5 abríl no rezultadu negativu ne’ebé fó-sai iha 6 abríl,” Koordenadór pilár VII, Nilton do Carmo da Silva hateten ba jornalista Agência Tatoli via telefónika, kinta ne’e.

Notísia relevante:COVID-19: JdSNB ba izolamentu ho transporte rasik

Médiku ne’e subliña, bainhra pasiente ida izola an, liu loron 10 mak ninia teste swab ho rezultadu negativu, ne’e  deklara katak rekoperadu.

Doutór Nilton mós hakarak halo esplikasaun balun kona-bá diferensa entre kuarentena ho izolamentu katak, kuarentena hanesan fatin atu observa durante periúdu inkubasaun, hodi garante katak, ema ne’e la lori virus iha-nia isin.

Kuarentena ne’e aplika ba ema ne’ebé viajen hosi fatin kontaminadu ou kontaktu besik ho ema ne’ebé pozitivu ho durasaun mínimu loron 14, tanba periúdu inkubasaun virus.

Kona-bá kriteriu alta hosi kuarentena ne’e, tenke kompleta loron 14 ho rezultadu negativu.

Nota adisionál bainhira iha kuarentea, molok kompleta loron 14, iha ema ruma deteta pozitivu, sira ne’ebé iha fatin hanesan tenke repete loron 14.

Enkuantu, fatin izolamentu ho objetivu atu prevene ema ne’ebé lori virus iha-nia isin, la hada’et tutan ba ema seluk.

Izolamentu aplika ba ema hotu ne’ebé detetadu pozitivu, ho durasaun mínimu loron 10, tanba, hafoin loron 10 sura hosi loron detetadu pozitivu ninia kapasidade atu transmite ba ema seluk ki’ik liu ona.

Kritériu alta hosi sala izolamentu maka, tenke kompleta mínimu loron 10 ho rezultadu teste negativu dala ida.

Nota adisionál balun hosi sala izolamentu, uluk: tuir rekomendasaun hosi Organizasaun Mundial Saúde (OMS), tenke negativu dala rua. Agora: Tuir rekomendasaun OMS, basta kompleta loron 10, maibé TL inklui tan pozitivu dala ida, atu bele seguru liu.

Iha 28 marsu, Sala Situação Centro Integrado Gestão de Crise (SS-CIGC), anunsia rezultadu teste swab dahuluk hosi JdSNB ne’ebé detetadu pozitivu COVID-19, no  kolabora hodi kumpre izolamentu iha otél Novo Horizonte.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here