Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kinta (08/04). Imajen TATOLI/Egas Cristovão

DILI, 08 abríl 2021 (TATOLI)Governu liuhosi reuniaun Konsellu Ministru (KM) aprova ona projetu Rezolusaun Governu ne’ebé suspende impozisaun konfinamentu domisiliáriu jerál ba populasaun iha munisípiu Dili to’o Governu deside filafali.

“Desizaun ne’e tanba haree ba inundasaun iha loron 04 abríl liubá, ne’ebé halo populasaun barak mak hetan impaktu hanesan uma barak mak a’at,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu iha Palásiu Governu, kinta ne’e.

Aleinde ne’e, Governu deside suspende konfinamentu obrigatóriu iha Dili ho razaun tanba situasaun dezastre naturál ne’ebé akontese, halo sidadaun barak mak sofre no muda fatin.

“Nune’e, ba hirak ne’ebé atu fó apoiu bele halo movimentu bá-mai hodi oferese apoiu sira ne’e,” nia hatutan.

Portavós Governu ne’e dehan, maski suspende konfinamentu domisiliáriu maibé serka sanitária sei mantein nafatin.

Notísia relevante: Governu renova serka sanitária iha munisípiu tolu

“Tanba ne’e, sidadaun sira bele dezloka ba munisípiu maibé naftin tenke haruka pedidu ba Sala Situasaun-Sentru Integradu Jestaun no Krize (CIGC, sigla portugés) no halo teste swab ho rezultadu negativu mak bele arranka,” nia akresenta.

Nune’e mós, loke dalan ba atividade ekonómika sira bele reativa iha kapitál nasaun ne’e, hanesan loja fa’an roupa foun no segundo mão (obralan).

Nune’e mós, movimentu transporte públiku hanesan mikrolete no taxi bele funsiona hikas nune’e bele fasilita populasaun hotu iha kapitál Dili durante períodu ne’e.

Maski nune’e, Governu apela ba populasaun sira atu kontinua prátika nafatin regra prevensaun COVID-19 tuir Organizaun Mundiál Saúde (OMS) no Ministériu Saúde (MS).

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here