Ekipa EDTL kontinua hadi’a infraestrutura eletrisidade ne’ebé a’at iha kapitál Dili. Imajen/EDTL

DILI, 08 abríl 2021 (TATOLI)Udan ho intensidade boot no provoka inundasaun iha domingu (04/04) kuaze iha territóriu tomak inklui Dili ne’ebé mak hetan impaktu maka’as, halo infraestrutura públika no privada barak mak a’at.

Prezidente Eletrisidade de Timor-Leste, Empreza Públika (EDTL, E.P), Paulo da Silva, hateten inundasaun estraga ai–rin eletrisidade, barak mak monu no rohar, tanba ne’e presiza hadi’a.

“Dezastre naturál la’ós iha Dili de’it, maibé antes ne’e afeta mós ba munisípiu seluk, tanba ne’e estagu ai-rin eletrisidade barak, se ita sura totál hotu iha Timór laran ho distánsia pelumenus kilómetru 15 to’o 20, signifika iha ai-rin lubuk inklui mos enfraestrutura eletrisidade hanesan nia kabu sira, presiza kustu to’o $100.000 resin hodi halo rekuperasaun,” Prezidente EDTL hateten ba Agência TATOLI, iha Palásiu Governu, kinta ne’e.

Notísia relevante: EDTL esforsu normaliza eletrisidade lakan normál iha territóriu nasionál

Tuir Respinsável ne’e, ekipa téknika sira sei buka esforsu hodi hadi’a ai-rin balun ne’ebé a’at ho ai-rin eletrisidade rezerva ne’ebé maka daudaun iha hela.

Nia haktuir, inundasaun ne’e la’ós halo de’it ai-rin eletrisidade maka a’at maibé halo empreza estatál ne’e lakon reseitas barak.

“EDTL lakon reseita tanba ho akontesimentu ne’e ahi mate, entaun hanesan lakon dobru tan no lakon tempu mós dala-ida,” nia akresenta.

Iha Dili udan boot halo bee sa’e maka’as no estraga fasilidade inklui munisípiu seluk hanesan Liquiçá, Ermera, Viqueque,Manatuto, Aileu no Same.

“Iha loron tolu ka haat ne’e nia-laran, EDTL halo esforsu atu normaliza ahi lakan normál iha territóriu, maski iha fatin balun sei kontinua rekupera maibé kuaze fatin hotu normaliza hikas no ita-nia kliente bele asesu filafali enerjia eletrisidade,” nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here