Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu. Imajen TATOLI/Egas Cristovão

DILI, 08 abríl 2021 (TATOLI)–Governu liuhosi reuniaun Konsellu Ministru (KM), deside nomea António dos Santos de Matos, nu’udár Diretór Ezekutivu ba Institutu Peskiza, Dezenvolvimentu, Formasaun no Promosaun Bambú, Institutu Públiku (IPDFP, I.P) ba períodu tinan tolu.

Nomeasaun ne’e bazeia ba Projetu Rezolusaun Governu ne’ebé aprezenta hosi Ministru Agrikultura no Peskas, Pedro dos Reis, ne’ebé aprovadu hosi ezekutivu sira.

“Governu investe ona osan hodi hadi’a kondisaun infraestrutura no hasa’e rekursu umanu institute hodi sai indústria kiik ne’ebé modernu liután hodi hala’o nia serbisu prodús mobiliáriu oin-oin uza produtu bambú (au) Timór,” Ministru Prezidénsia Konsellu, Fidelis Manuel Leite Magalhães, relata hafoin ramata reuniaun KM iha Palásiu Governu, kinta ne’e.

Notísia relevante: Governu Sei Sosa Karteira Rihun 35 Fahe Ba Eskola iha Timor

Iha tinan ne’e, Governu aloka ona $623.971 ba institutu públiku ne’e, ne’ebé fahe ba kategoria bens no servisu $506.334, kapitál menór $44.300 no kapitál dezenvolvimentu $73.337.

Ba tinan ne’e, programa IPDFP prioritiza hasa’e produsaun no komersializa bambú iha merkadu nasionál no internasionál.

Aleinde ne’e, programa prinsipál medida sektorál iha tinan 2021 mak hanesan kontinua insentiva hodi dezenvolve produsaun no komersializa produtu  bambú, kontinua insentiva agrikultór ba kriasaun viveiru no aumentu plantasaun atubele sustentável iha futuru.

Nune’e mós, asegura matéria prima bambú (ripas e troncos) atu fasilita serbisu transformasaun, produsaun  produtu bambú ho kualidade no asegura aumenta reseita.

Instututu ne’e sei implementa  mós polítika jéneru, promove boa governasaun no jestaun institusionál no fortalese kapasidade rekursu umanu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here