Sekretáriu Estadu Kooperativa, Elizário Ferreira, entrega foos ba abitante iha Becora. Imajen/SEKoop

DILI, 07 abríl 2021 (TATOLI)–Sekretáriu Estadu Kooperativa (SEKoop), Elizário Ferreira hamutuk ho Sekretáriu Estadu Juventude no Desportu (SEJD), Abão Saldanha ‘Nokosiku’ kontinua apoia nesesidade bázika ba komunidade iha suku Becora no suku Aileok, munisípiu Dili ne’ebé foin daudaun hetan impaktu hosi dizastre naturál.

“Ita hotu hatene inundasaun foin daudaun lori tristeza boot, liu-liu komunidade iha Dili hotu-hotu hetan impaktu. Tanba ne’e ohin ami fó apoiu oituan hanesan nesesidade bázika ba maluk sira atu ajuda augenta to’o loron hirak ba oin hodi hein apoiu tuir mai hosi Estadu,” Sekretáriu Estadu Kooperativa hateten ba Agência TATOLI iha Terminál Becora, kuarta ne’e.

Notísia relevante: SEKoop-SEJD apoia foos saka 200 ba komunidade iha aldeia Samatana

Tuir governante ne’e, komunidade sira presiza tebes apoia tanba iha aldeia balun sasán la konsege salva.

Iha fatin  hanesan, resprezentante komunidade aldeia Karau Maten, Jacinto Soares ‘Sinto Kulau’, agradese ba SEKoop no SEJD tanba bele apoia komunidade afetadu dezastre naturál iha suku rua ne’e.

“Komunidade sira afetadu hotu no seidauk iha ema ruma fó ajuda, maibé prezensa membru Governu na’in-rua bele ajuda maski oituan maibé bele aguenta ba uma-kain ida-idak,” nia dehan.

SEKoop no SEJD fó apoia ba komunidade iha aldeia Ailele Hun, suku Becora ba uma-kain 50, aldeia Karau Maten, suku Becora uma-kain 117, aldeia Bedois, suku Becora uma-kain 63, aldeia Sukaer Laran, suku Ailok uma-kain 33, aldeia Laklo ema 100  no aledeia Mota Ulun, suku Becora uma kain 21, aldeia Terminál uma-kain 130 no aldeia Fatu Francisco ema 149.

Sasán ne’ebé distribui kompostu hosi supermie no foos saka ida ba kada uma-kain.

Aleinde ne’e, SEKoop no SEJD fó mós apoia tanke lima ba komunidade iha aldeia Terminál no Fatu Francisco ne’ebé falta bee-moos.

Jornalista: Natalino Costa

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here