Ministru Finansa, Rui Augostu Gomes. Imajen TATOLI/António Gonçalves

DILI, 06 abríl 2021 (TATOLI)—Governu propoin atu halo retifikasaun ba Orsamentu Jerál Estadu (OJE) 2021 ho intensaun atu atua efeitu negativu sira hosi surtu COVID-19 no apoia sósiu-ekonómika iha rai-laran.

Ministru Finansa Rui Gomes marka prezenta iha Parlamentu halo justifikasaun kona-ba pedidu urjénsia no prioridade ba proposta atu retifika lei númeru 14/2020, 29 dezembru, kona-ba Orsamentu Jerál Estadu 2021 nian.

“Ho intensaun atu responde lalais efeitu negativu sira-ne’ebé rezulta hosi surtu COVID-19 no efeitu negativu hosi aplikasaun medida serka sanitária iha kapitál Dili no munisípiu balun tanba Governu hakarak prevene no kombate COVID-19, ne’ebé ninia evolusaun lalais tebes no tendénsia atu agrava tán,” Ministru Finansa ko’alia liuhosi debate pedidu karáter urjénsia ba retifikasaun OJE 2021, iha Parlamentu Nasionál, tersa ne’e.

Nia dehan, hosi intensaun ne’ebé temi ona Governu hakarak prevene no kombate moras COVID-19, ho evolusaun COVID-19 ne’ebé númeru kazu pozitivu aas tebes nune’e preszia hasa’e tán kapasidade sistema nasionál saúde nian atu responde tanba iha implikasaun ba aumentu iha despeza.

Nia hatutan, iha tinan kotuk Timor-Leste sai nasaun ho insidénsia kiik ba moras COVID-19 ne’ebé rejista kazu pozitivu hamutuk 29 iha fulan-hitu nia laran.

“Hahú tinan ida-ne’e to’o ohin kazu infetadu sa’e ona ba 700-resin, atu moras COVID-19 labele hamate ema, mesmu ema ida mate ona horikalan mak presiza lalais sosa no halo vasinasaun kontra moras ne’e iha territóriu nasionál. Ita mós presiza kondisaun atu halo tratamentu ba ema moras sira-ne’ebé internadu,” nia dehan.

Nia akresenta, atu antesipa moras labele da’et mak presiza halo konstrusaun no arrendamentu ba fatin kuarentena no izolamentu no reforsa kapasidade fatin ezistente sira-ne’ebé iha ona.

Nune’e mós presiza kontinua teste swap hodi deteta moras COVID-19 iha komunidade nia leet, tanba ne’e mak presiza sosa tán reajente atu fasilita pesoál tékniku sira iha laboratóriu nasionál hodi halo teste ba amostra ne’ebé rekolla.

Nia hateten, profisionál saúde, pesoál seguransa, limpeza no seluk tán ne’ebé servisu iha liña-frente presiza hetan protesaun ba sira-nia aan rasik ho ekipamentu própriu.

Ministru Finansa ne’e fó-sai katak, pesoál sira-ne’ebé liña-frente hasoru risku oioin iha prevensaun no kombate surtu ne’e liuhosi servisu koordenasaun Sentru Integradu ba Jestaun Krize nian (CIGC-sigla portugés).

“Ho aprovasaun proposta atu retifika OJE 2021 liuhosi dotasaun fundu COVID-19 nian bele fó espasu ba Governu atu asegura prestasaun servisu, liuliu responde nesesidade no aspirasaun povu no nasaun iha área saúde nian,” nia dehan.

Nia argumenta, razaun daruak mak apoia sósiu-ekonómika relasiona aplikasaun serka sanitária agrava liután situasaun ekonómika no sosiál iha Timor-Leste.

“Iha kapitál Dili, impaktu negativu hosi serka sanitária hetok boot tanba Dili kontribui liu 90% hosi Timor-Leste nia produtu internu brutu, munisípiu sira seluk mós sofre konsekuénsia kuandu Dili iha serka sanitária nia laran, atividade komérsiu taka durante serka sanitaria,” nia subliña.

Iha situasaun ida-ne’e, obriga empreza sira taka negósiu no dezempregu mós sa’e makaas, ne’ebé ikusliu rezulta iha redusaun substansiál iha rendimentu traballadór sira-nian liuliu família sira ho rendimentu kiik.

Nia dehan, dezempeñu ekonomia naun-petrolífera depende makaas liu ba papél Estadu liuhosi despeza públika.

“Previzaun ikus hatudu katak ita-nia internu brutu ba tinan ida-ne’e sei lato’o 3,9% tuir estimativa inisiál. Previzaun foun hatudu katak kresimentu ida kiik sei akontese iha tinan ida-ne’e por volta 2%. Ida-ne’e la sufisiente atu taka períodu rejesaun iha 2017, 2018 no 2020,” nia haktuir.

Ministru Finansa ne’e informa, previzaun ba tinan 2021 ho kresimentu kiik bazea presu-postu katak ho aprovasaun proposta atu retifika Lei OJE 2021 sei premite fó apoia ba empregu liuhosi subsídiu estraordinária ba traballadór sira, traballadór sira halo auto-empregu.

Ba emprezáriu reprezenta individuál, traballadór sira-ne’ebé halo servisu doméstiku, traballadór sira-ne’ebé eskreve tiha ona iha sistema seguransa sosiál, tanba sira kontribui tiha ona maibé tanba lakon servisu entaun sira la konsege kontinua.

Nia dehan, ho kondisaun atuál defísil tebes atu halo bisnis iha Timor-Leste tanba ne’e mak ho aprovasaun medida sira hanesan dispensa dever atu selu kontribuisaun sosiál ne’ebé sai responsabilidade traballadór sira-nian, entidade empregadora sira inklui subsídiu estraordinária ba kompartisipasaun eletrisidade.

“Ho ambiente ida defísil atu hala’o bisnis ho tán aplikasaun serka sanitária mak empreza sira-ne’ebé deve hela osan hosi banku, sira la konsege selu sira-nia tusan tanba ne’e mak nesesária atu introdús fila-fali moratória kréditu hanesan tinan kotuk. Katak, Estadu kompartisipa iha pagamentu jurus durante fulan balun no obrigasaun restituisaun kapitál,” Ministru Finansa Rui Augusto Gomes informa.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here