Primeiru-Ministru, Taur Matan Ruak. Imajen TATOLI/Egas Cristóvão

DILI, 07 abríl 2021 (TATOLI)–Primeiru-Ministru (PM), Taur Matan Ruak, enkoraja ekipa liña frente hanesan profisionál saúde, Polísia Nasionál Timor-Leste (PNTL), FALINTIL-Forsa Defeza Timor-Leste (F-FDTL) atu kombate COVID-19 iha Timor-Leste.

“Haree ba númeru kazu loron ba loron aumenta, dezafiu ba oin maka presaun maka’as liu ba liña frente sira. Entaun ha’u aproveita enkoraja liña frente sira inklui autoridade hotu ne’ebé fó apoiu halo esforsu maka’as atu miniza risku ida ne’e iha ita-nia rain,” PM Taur hateten iha ámbiru seremónia lansamentu vasina AstraZeneca ne’ebé hala’o iha Sentru Saúde Bairro Formosa, kuarta ne’e.

Xefe Governu nota katak hahú dezembru 2020 kazu ativu COVID-19 sa’e maka’as, tanba iha fatór rua mak kontribui maka’as hanesan aumentu drástikamente númeru COVID-19 iha viziñu Indonézia liu-liu iha provínsia Timór Osidentál (NTT, sigla indonéziu) no pasajen ilegál iha fronteira ne’ebé lori moras ne’e tama mai Timór.

Tanba ne’e, nia konsidera faze inisiál iha importasaun tama iha faze daruak kontájiu lokál no prátikamente daudaun ho dezastre naturál posibilidade iha ona faze kontájiu komunitária, tanba ne’e nia husu entidade hotu liu-liu liña frente atu kombate.

“Ita labele nega situasaun ida ne’e. Dezafiu ne’e ba oin sei maka’as, liuliu presaun maka’as ba liña frente sira,” nia fó hanoin.

Iha biban ne’e, Xefe Ezekutivu ne’e manifesta kondolénsia ba família matebian ida ne’ebé mate tanba moras komplikasaun no COVID-19.

“Kompleta tinan ida ohin, infelizmente ita hetan vítima dahuluk, ha’u hakarak lori Governu no ha’u nia naran rasik manisfesta profunda kondolénsia ba família timor-oan ne’ebé mate tanba COVID-19, mate hotu iha mundu tomak ultrapasa millaun 20-resin no ba sira-nia família sei la tama, espera katak Maromak simu sira iha fatin ne’ebé kmanek no deskansa internamente,” nia subliña.

To’o tersa (06/04), Timor-Leste rejista kazu mate ba COVID-19 na’in-ida, no kazu ativu iha munisípiu Dili hamutuk 10, nune’e kazu ne’ebé detetatu iha Dili hosi loron 07 marsu to’o 06 abríl hamutuk 622.

Enkuantu kazu foun horseik (tersa) hamutuk 13, kazu rekuperadu laiha, totál kazu ativu hamutuk 485.

Jornalista: Antónia Gusmão

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here