PA RAEOA-ZEESM, Arsénio Paixão Bano, entrega sasán ba komunidade. Imajen/ZEESM,TL

DILI, 07 abríl 2021 (TATOLI)–Prezidente Autoridade (PA) Rejiaun Administrativa Espesiál Oé-cusse no Ambeno (RAEOA) no Zona Espesiál Ekonomia Sosiál Merkadu  (ZEESM) Timor-Leste, Arsénio Paixão Bano, hamutuk ho ekipa fó apoia umanitária ba vítima dezastre naturál ba uma-kain hamutuk 135 iha suku Lifau no suku Cunha.

Distribuisaun ai-han akompaña hosi Sekretária Rejionál Edukasaun Solidariedade Sosiál, Abelina da Costa, Sekretáriu Rejionál Komérsiu Indústria, Pedro da Cunha da Silva, no Sekretáriu Rejionál Terras Propriedade. Antonio H. da Costa.

“Apoiu ai-han ba populasaun sira ne’ebé hela iha Bairro Nefo-Bai, aldeia Nefo-bai, suku Lifau ho totál uma-ka’in 66, hodi ajuda foos kilograma 25 hamutuk saka 66,” PA RAEOA informa ba Agência TATOLI, via telefónika.

Komunidade suku rua iha Oé-cusse simu apoia umanitária. Imajen/ZEESM

Enkuantu, Protesaun Sivíl, Bombeiru no entidade seluk hosi rejiaun ne’e, fó apoia foos kilograma 25 saka 69, super-mie, Óleo, Balde, Lona no family kids ba populasaun sira ne’ebé hela iha iha Bairro Nunuhenu, aldeia Noe-Ninen, suku Cunha hamutuk uma-kain 69.

Uma-kain hirak ne’e hetan impaktu hosi inundasaun hafoin udan no anin iha loron 03 to’o 04 abríl.

Hafoin entrega apoia umanitária, PA RAEOA observa direta kondisaun iha Bairro Nunuhenu, ne’ebé impaktu dizastre naturál estraga populasaun nia sasán uma-laran, to’os, natar no animál sira.

“Ita sei halo koordenasaun ho Sekretáriu Rejionál sira atu nune’e bele hadi’a no reabilita fatin hirak ne’bé hetan estragu no bele reativa filafali vida populasaun,” nia akresenta.

 Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here