DILI, 07 abríl 2021 (TATOLI)—Organizasaun Mundiál Saúde (OMS) hakarak atu entidade hotu-hotu hamutuk hodi harii mundu pós-COVID-19 ne’ebé justu liu no saudável liu.

Dezeju ka hakarak ne’e OMS espresa liuhosi komunikadu ne’ebé Agência Tatoli asesu, liga ho komemorasaun loron mundiál saúde, ne’ebé selebra iha kuarta ne’e.

Notísia relevante:OMS agradese COVAX, apela povu TL labele tauk simu vasina

“Iha Loron Mundiál Saúde-nian ida-ne’e, OMS haree liu ba oportunidade ne’ebé ita iha, atu harii mundu ida ne’ebé justu no saudável liu, hafoin COVID-19,” OMS haktuir liu hosi komunikadu.

Iha komunikadu ne’e deskreve katak, durante tinan ida-nia laran, komunidade hirak ne’ebé marjinalizadu iha mundu tomak no iha Rejiaun Sudeste-Aziátika, sofre ona efeitu pandemia COVID-19 nian.

Nune’e mós iha nasaun-sira ne’ebé riku no ki’ak, fatór sosioekonómiku, polítiku, edukativu no jeográfiku no seluk, fasilita ona propagasaun virus SARS-CoV2 nian, hodi fó impaktu ba saúde no aumenta dezigualdade sira.

“Iha ita-nia mundu ne’ebé la igualdade,  dezigualdade sosiál no ekonómiku ne’ebé bele prevene, taka ema hotu-nia direitu, iha fatin hotu-hotu, atu alkansa padraun saúde fíziku no mentál ne’ebé di’ak – injustisa ida ne’ebé ita labele simu,” subliña.

OMS konsidera COVID-19 nu’udár moras atuál ne’ebé hatudu, halo esplorasaun no agrava liu tan dezigualdade-sira ne’ebé fó impaktu negativu ba saúde no ba rezultadu sosioekonómiku-sira entre no iha grupu vulneravel-sira.

Sita mós katak, iha nasaun sira la depende ba nivel rendimentu no dezenvolvimentu, saúde no moras tuir situasaun sosiál,  pozisaun sosioekonómiku ki’ik,  saúde aat-liu  no ladún iha asesu ba serbisu saúde ho kualidade ne’ebé adekuadu.

Tanba ne’e OMS haree katak, moras hada’et nia todan iha Rejiaun hanesan TBC, epatite no HIV-SIDA mak grave-liu entre populasaun-sira ne’ebé ki’ak no desfavoresidu, ne’ebé sofre efeitu trájiku hosi konsolidasaun hosi pobreza no marjinalizasaun hosi komunidade-hirak ne’e.

“Tanba ne’e mak moras ne’ebé la da’et hanesan enfarte no moras fuan bele hetan barak liu entre populasaun-sira ne’ebé iha espozisaun ba fatór risku sosiál hanesan urbanizasaun ne’ebé la planeia no uma ne’ebé la adekuadu, bele kontribui ba poluisaun ar uma laran-nian, inseguransa ai-han no malnutrisaun,” esklarese.

Atu hadi’a dezigualdade kona-bá saúde, no mós atu kria mundu pós pandemia  ida ne’ebé justu no saudável liu, OMS apela ba lider-sira iha setór saúde-nian no entidade hotu atu halo esforsu konsertadu-sira durante resposta no rekoperasaun  COVID-19,  hodi garante katak, ema hotu-hotu moris no serbisu ho kondisaun  ne’ebé loke dalan ba saúde no moris di’ak.

Alende ne’e, bee moos no anin moos, rendimentu no protesaun sosiál,  seguransa ai-han entre sasán ambientál no polítika públika-sira seluk importante tebes atu atinje objetivu ida ne’e, no bele asegura di’ak liu hosi abordajen  ‘saúde iha polítika hotu’ ne’ebé sensível ba jéneru no foka ba direitu umanu, bazeia ba prinsípiu fundamental-sira hosi ajenda Dezenvolvimentu Sustentável 2030 nian katak, ‘La husik ema ida iha kotuk’.

OMS subliña katak, sistema saúde-sira rasik iha papél importante. Hahú tinan 2014, Rejiaun ne’e alkansa ona kobertura saúde universál (KSU) hanesan Prioridade Bandeira, ho objetivu atu asegura ema hotu bele iha asesu ba serbisu saúde-nian ne’ebé sira presiza, iha fatin no bainhira sira presiza, sein difikuldade finanseira no ne’e OMS hetan ona progresu. 

Dadus OMS ne’ebé hatudu hosi relatóriu monitorizasaun Rejiaun-ne’e nian ba tinan 2020 hatudu katak, kobertura serbisu saúde daudaun ne’e iha média, aas liu 63%, kompara ho 49% iha dékada ida liubá. 

Densidade traballadór-sira saúde nian besik 70% hosi sira-ne’e mak feto kontinua aumenta, ho país sia ne’ebé daudaun liu limite másimu OMS nian, kompara ho neen iha tinan 2014.

Maibé limitasaun fiskál-sira ne’ebé impoin hosi pandemia ne’e ameasa atu halo progresu pára ka fila ba kotuk anaunserke orsamentu-sira hetan prioritizasaun foun no fahe rekursu adisionál-sira ba saúde.

OMS énfaze katak, tenke esplora fonte reseita-sira ne’ebé foun, hanesan aumenta impostu ba produtu ne’ebé la saudável hanesan tabaku, alkól no bebida ne’ebé ho masin midar. Tenke kontinua hadi’a valór ba osan, inklui investimentu iha kuidadu saúde primáriu no inisiativa pro-kiak-sira ne’ebé tulun atu hamenus determinante sosiál sira saúde-nian.

Krusialmente, komunidade tenke kontinua envolve no rona-malu tanba sira liu hosi resposta ba COVID-19. Sosializasaun no hakbiit komunidade, inklui liu huosi organizasaun-sira ne’ebé lidera hosi feto, bele tulun atu identifika kauza abut hosi dezigualdade no buka solusaun-sira ne’ebé lokalizada, no mós hadi’a koordenasaun entre serbisu saúde no sosiál no komunidade alvu-sira.

Governu tomak, aproximasaun sosiedade tomak-nian ne’ebé nasaun-sira mobiliza atu hatán ba pandemia ne’e, fornese modelu di’ak, ne’ebé bele aselera progresu ba KSU, no  Objetivu Dezenvolvimentu Sustentável  3 no Ajenda Dezenvolvimentu Sustentável ne’ebé luan liu.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here