Kondisaun iha ponte no merkadu Becora hafoin inundasaun iha kapitál Dili. Imajen TATOLI/António Gonçalves

DILI, 07 abríl 2021 (TATOLI)–Ministru Obra Publika (MOP), Salvador Eugênio Soares dos Reis Pires, fó ona orientasaun ba ekipa téknika sira atu loke estrada provizóriu hodi fasiltita movimentu transporte hafoin estrada no ponte kotu tanba inundasaun ne’ebé kontese iha domingu (04/04) iha munisípiu sira inklui kapitál Dili.

 “Ha’u orienta loke estrada temporáriu ka alternativu ba estrada no ponte sira ne’ebé kotu iha territóriu tanba impaktu hosi dezastre naturál, liuliu loke estrada temporáriu hosi Beduku to’o Sarlala hodi fasilita movimentasaun transporte públiku no privadu iha área refere,” Ministru Salvadór ne’e informa ba Agência TATOLI, kuarta ne’e.

Antes ne’e, governante ne’e konvoka enkontru ho Direitór Jerál Administrasaun no Finansa (DJAF), Januário Barbosa, Direitór Jerál Obra Públika (DJOP), Rui Hernani, Jestór Unidade Manajementu Projetu (PMU, sigla inglés), Sidónio Amaral, no akompaña mós hosi tékniku sira hodi ko’alia kona-ba responde dezastre naturál ne’ebé konsege estraga infraestrutura públika balun.

Notísia relevante: IGE konsentra normaliza mota área risku ba populasaun

Aleinde ne’e, fó mós instrusaun ba Institutu Jestaun Ekipamentu (IGE, sigla portugés) atu kontinua normalizasaun no hasai sedimentasaun iha mota no ponte sira, inklui apoia emerjénsia hodi loke dalan alternativu sira.

Daudaun ne’e, Ekipa IGE tama ona ba loron datoluk halo serbisu iha área inundasaun sira no edifísiu públiku balun.

Notísia relevante: Governu kálkulu kustu estragu dizastre naturál territóriu tomak millaun $100

Iha loron hirak liubá, Ministru Salvador akompaña Primeiru Ministru, Taur Matan Ruak, hodi identifika diretamente estrada Beduku ne’ebé hetan estragu no kotu totál.

Nune’e, Primeiru-Ministru orienta atu loke dalan alternativu hodi fasilita movimentasaun entre kapitál Dili ba munisípiu sira iha rai-klaran no Kosta Súl.

Entretantu, Governu liuhosi MOP hahú halo identifikasaun ba estragu estrada no ponte iha territóriu atu kuantifika hodi halo rekuperasaun.

Jornalista: Florêncio Miranda Ximenes

Editora: Julia Chataria

HAKEREK NO HATÁN

Please enter your comment!
Please enter your name here