Loder suru-sees hela tahu-teen iha areadores Palásiu Prezidensiál Bairru-Píte, Dili, hafoin udan-boot iha domingu (04/04) madrugada ne’ebé hamosu inundasaun. Imajen/Facebook: Jufer Gutrres.

DILI, 07 abril 2021 (TATOLI)—Diretór Jerál Prezidénsia Repúblika, Domingos Amaral, informa Institutu Jestaun Ekipamentu, Institutu Públiku (IGE, I.P) hamutuk ho Korpu Bombeiru Timor-Leste no Prezidente Kámara Komérsiu Indústria Timor-Leste, Orcar Lima, nia empreza mak ajuda voluntáriu hamoos tahu iha Palásiu Prezidente durante loron tolu (05-07/04/2021) ona maibé seidauk hotu tanba tahu nia mahar to’o sentimetru 50 (50cm).

Notísia Relevante: Prezidente Repúblika hato’o solidariedade ba povu Timor-Leste

“Ita hamoos tahu-teen hahú iha segunda to’o kuarta ohin maibé seidauk bele hotu tanba tahu ne’ebé bee lori tama mai Palásiu Prezidente ne’e nia mahar sentimetru 50, nune’e ita labele halo hotu. Maske hetan tulun voluntáriu hosi empreza timoroan no hosi Governu rasik inklui ita-nia funsionáriu PR nian maibé hamoos seidauk hotu,” Domingos Amaral informa ba Agência TATOLI, liuhosi telefónika, kuarta ne’e.

Imajen/Facebook: Jufer Guterres.

Domingos Amaral hateten, maske loron rua nia-laran udan no lori tama tahu no foer ba Palásiu Prezidente nia laran maibé laiha ekipamentu ka sasán mak hetan estragus.

“Maske rai-tahu ho sentimetru lima maibé ekipamentu iha Palásiu Prezidente laiha ida mak aat, so bee de’it mak lori tama tahu. Maibé ami kontaktu ho IGE iha loron segunda ne’e kedas hodi ajuda suru no xupa sai bee-fo’er sira-ne’e,” Diretór Jerál PR informa.

Tuir nia, aban (kinta, 09/04) sei kontinua hamoos tahu no posibilidade semana ne’e bele hamoos halo hotu, nune’e atividade Palásiu Prezidensiál ne’e bele la’o normál fali tanba to’o agora atividade hotu paradu no hotu-hotu konsentra hamoos fo’er.

Nia infroma, bainhira hamoos hotu ona mak nia sei informa ba parte Eletresidade de Timor-Leste (EDTL) atu haree mákina iha Palásiu Prezidente nian bele funsiona fali mak funsionáriu Prezidénsia Repúblika bele hala’o fila-fali nia atividade hanesan baibain.

Notísia Relevante: Palásiu Prezidente Repúblika Sai Palásiu “Lalubur”

Dezastre naturál iha TL, ema 21 lakon vida

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here