Embaixada Korea iha Timor-Leste. Imajen/Espesiál

DILI, 07 abríl 2021 (TATOLI)–Governu Korea Súl liuhosi reprezentante permanente iha Timor-Leste deklara loke hikas oportunidade hodi simu traballadór timor-oan ba serbisu, hafoin suspende entrada traballadór tanba aeroportu taka.

Embaixada Korea iha Timor-Leste, Kim Jeong-Ho, hateten,  sei simu fali traballadór timor-oan foun ne’ebé mak suspende desde tinan kotuk tanba COVID-19.

“Governu Korea deside loke hikas fronteira ba traballdór timor-oan, liuhosi reuniaun sentrál  kontrola moras ne’ebé halo iha tempu balun liubá,” Embaixadór aviza, hanesan haktuir iha nota ne’ebé Agência TATOLI asesu, kuarta ne’e.

Notísia relevante: Traballadór 460 sei aranka bá Korea Súl hafoin aeroportu loke

Durante ne’e, Governu Korea simu de’it traballadór timor-oan ne’ebé maka antes ne serbisu ona iha ne’ebá inklui traballdór 49 ne’bé foin lalais aranka.

Embaixada hamutuk ho Ministériu Negósiu Estranjeiro no Kooperasaun (MNEK) no Sekretaria Estadu Formasaun Profisionál no Empregu (SEFOPE) durante ne’e serbisu maka’as atu haruka fali traballadór bá Korea. 

“Ami agradese ba líder timor-oan ne’ebé fó ona atensaun ba programa Employment Permit System (EPS). Ami espera informasaun ida-ne’e bele konsola timor-oan ne’ebé mak triste hela tanba inundasaun ne’ebé akontese iha domingu kotuk,” refere nota.

Liuhosi reprezentante Dezenvolvimentu Rekursu Umanu Korea, sei halo koordenasaun ho SEFOPE kona-ba detallu hotu atu nune’e traballadór timor-oan foun bele aranka iha tempu badak.

Antes ne’e, Diretór Nasionál Empregu Esteriór SEFOPE, Filomeno Soares, informa, traballadór regulár ne’ebé ona teste no foin primeira vez atu bá, iha kontratu hamutuk 460 ne’ebé hein atu aranka de’it.

Maibé Korea Súl seidauk simu traballadór no kontratu tama hotu iha voo komersiál, enkuantu seidauk reativa.

Hosi tinan 2009 to’o 2020, traballadór timor-oan hamutuk 3.696 mak serbisu ona iha Korea Súl iha área peska, fábrika no agrikultura.

Jornalista: Natalino Costa

Editora: Julia Chatarina

1 KOMENTÁRIU

HAKEREK NO HATÁN

Please enter your comment!
Please enter your name here