Primeiru-Ministru, Taur Matan Ruak, akompaña ho entidade relevante observa infraestrutura públika iha kapital Dili ne’ebé hetan estragu tanba inundasaun, iha estrada Bebonuk, tersa (06/04). Imajen TATOLI/António Gonçalves

DILI, 06 abríl 2021 (TATOLI)—Timor-Leste daudaun hasoru hela situasaun difisil hanesan COVID-19 no dizastre naturál ne’ebé akontese iha loron hirak liubá hodi rezulta infraestrutura barak mak a’at inklui ema balun tenke lakon vida.

Tanba ne’e, Primeiru-Ministru (PM), Taur Matan Ruak, enkoraja sidadaun sira atu luta hasoru situasaun difisil atu rekupera hikas.

“Ha’u hakarak apela ba inan-aman no populasaun tomak tanba ita iha problema rua ne’ebé ita enfrenta, tanba ne’e husu atu preparadu enfrenta hanesan situasaun COVID-19 no dezastre naturál ne’ebé iha ita-nia luta ne’e tenke manán, ita labele lakon,” Xefe Governu hateten hafoin observa kondisaun ponte Bekusi, Becora, tersa ne’e.

Notísia relevante: Dezastre naturál iha TL, ema 21 lakon vida

Nia konsidera situasaun sira koko sidadaun hotu maibé nia otimista bele ultrapasa tanba povu Timor-Leste balun hanesan luta na’in ne’ebé uluk luta hasoru Indonézia to’o ema 200.000 maka lakon vida.

“Ita luta nafatin tau-matan ba sira ne’ebé moris, klaru iha sorin ita tanis ba ita-nia ema ne’ebé mate maibé nafatin tenke tau-matan ba sira ne’ebé presiza apoia liuliu apoia médiku,” nia hatutan.

Xefe Ezekutivu mós hato’o kondolénsia ba família matebian Francisca Gama ho idade 44 ne’ebé mate tanba moras komplikasaun no COVID-19.

Notísia relevante: Mate-isin pasiente COVID-19 haloot ona, liu loron-10 família bele vizita

“Ohin ita rejista dahuluk ema ida mate tanba iha komplikasaun akompaña ho moras  COVID-19 tanba ne’e ekipa haloot nia iha fatin dook oituan,” nia hatutan.

Nune’e, PM ne’e husu ba sidadaun sira atu nafatin tuir medida prevensaun maski iha situasaun difisil nia laran hodi hadook-an hosi vírus.

“Ita tenke tane a’as vontade hodi luta hasoru pandemia globál iha Timor-Leste,” nia enkoraja.

PM nota katak nasaun seluk rejista ema mate tanba COVID-19 barak liu kompara ho Timor-Leste.

“Importante tenke iha vontade kombate kalamidade sira. Ha’u enkoraja ita hotu hamutuk tanba momentu sira hanesan ne’e mak povu tenke hanoin atu fó apoia ba sira ne’ebé hetan susar, liu-liu manifesta ita-nia solidaridade,” nia subliña.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here