Sekretáriu Estadu Protesaun Sivíl (SEPS), Joaquin Gusmão, tersa ne’e, hala’o observasaun direta ba iha fatin akontesimentu dezastre naturál iha área Bee-duku, Aldeia Moris Foun, Suku Comoro, Postu Administrativu Don Aleixo, Munisípiu Dili. Imajen Tatoli/Nelson de Sousa

DILI, 06 abríl 2021 (TATOLI)-Sekretáriu Estadu Protesaun Sivíl (SEPS), Joaquin Gusmão, tersa ne’e, hala’o observasaun direta ba iha fatin akontesimentu dezastre naturál iha área Bee-duku, Aldeia Moris Foun, Suku Comoro, Postu Administrativu Don Aleixo, Munisípiu Dili.

Rai halai hanehan fabitante na’in-neen mate hotu iha Bee-duku, Dili. Imajen Tatoli/Nelson de Sousa

Inundasaun, sábadu-domingu (03-04/04) iha área Bee-duku, rai hanehan abitante na’in-neen (6) ne’ebé kompostu hosi ema adultu ho labarik no inan feton ida isin rua, maibé abitante sira na’in lima mak família sira hetan fali ona sira-nia mate-isin, maibé labarik ida ho idade tinan-rua ho balun to’o agora seidauk hetan.

Joaquin  Gusmão, hateten objetivu hosi vizita ne’e mak atu observa fatin akontesimentu   oinsá mobiliza pezadu atu bele kee-rai hodi buka tuir vítima ida nia isin-mate ne’ebé seidauk hetan no suru mós rai sira ne’ebé monu no loke bee-dalan hodi normaliza bainhira udan mai fali.

Nia mós husu ba abitante sira bainhira udan tau maka’as to’o oras ida atu hadook an hosi fatin ne’ebé hela nune’e bele salva vida bainhira dezastre akontese.

Tuir observasaun Agência Tatoli iha terrenu nota katak komunidade lubuk mak hela iha  área Bee-duku, Aldeia Moris Foun, Suku Comoro ne’ebé besik iha foho lolon.

Marcos dos Santos, nu’udar vítima haktuir, iha udan-boot, foin lalais ne’e, nia ho nia kaben no oan na’in-tolu toba hela,.

Nia dehan, akontese rai-monu  primeiru hosi viziñu sira nian mak mai hale’u no viziñu-sira  ida-idak salva sira nia-an halai hosi fatin ne’e ba hasé hodi konsentra hamutuk

“Ha’u salva hela ha’u nia uma kotuk, rai komesa mai oituan-oituan, ha’u mós lori hela kanuru suru hela rai ne’e. Loloos ha’u mak mate uluk, tanba rai nakfera iha leten mai loos ha’u, maibé rai ho fatuk ne’e dudu sees tiha ha’u, ba loos uma ami nia uma dudu monu kedas, ha’u hakfodak fali haree ba uma nee tetuk no dasa loos ba de’it” Marcos dos Santos haktuir.

“Ha’u suru tia rai maibé la biban tanba rai tun maka’as no fatuk mós mai kona loos ha’u nia ulun maibé ha’u la sente katak kanek, hafoin  salva tiha viziñu rona ha’u nia oan ida bolu lalais tanba rai taka nia ulun de’it mak book an nune’e tama fali ba hakne’ak suru salva sai  no ha’u konsege salva sira nain haat viziñu nia oan na’in-rua.’’

Nia haktuir, momentu ne’ebá la hatene nia kaben no oan ida ne’ebé to’o agora seidauk hetan.

Marcos dos Santos, dehan, hosi akontesimentu ne’e nia kaben, oan feto-boot tinan-neen, oan daruak  tinan-haat, sira na’in-tolu, horiseik, sira-nia mate-sin haloot ona iha semináriu Balide, Dili. Hela maka oan mane ida seluk ho tinan rua ho balun, nia mate-isin buka seidauk hetan.

Jornalista       : Nelson de Sousa

Editór             : Francisco Simões

 

PUBLISIDADEiklan

HAKEREK NO HATÁN

Please enter your comment!
Please enter your name here