Primeiru-Ministru, Taur Matan Ruak, akompaña ho entidade relevante, observa estrada dirasaun Beduku ne’ebé hetan estragu tanba inundasaun, tersa (06/04). Imajen TATOLI/António Gonçalves

DILI, 06 abríl 2021 (TATOLI)—Udan ho intensidade boot iha oras barak nia laran provoka inundasaun, iha domingu (04/04), lori impaktu boot kuaze iha munisípiu hotu, liuliu kapitál Dili ne’ebé hetan impaktu maka’as tanba infraestrutura públika no privada barak mak a’at grave.

Ba kestaun ne’e, Primeiru-Ministru (PM), Taur Matan Ruak, hamutuk ho entidade relevante halo observasaun direta ba infraestutura hanesan ponte no estrada iha Dili ne’ebé hetan estragu hosi dizastre naturál.

Xefe Governu nota katak entidade hotu presiza serbisu hamutuk atubele rekupera fali situasaun tanba fatin barak presiza hadi’a, tanba ne’e husu mós kolaborasaun emprezáriu sira liu-liu ba hirak ne’ebé durante ne’e partisipa iha projetu infraestrutura.

“Ha’u apela ba sira (emprezáriu) atu hatene haketak negósiu no polítika hodi ajuda malu ho  Estadu hodi rezolve situasaun susar nia laran ne’e,” Xefe Governu hateten hafoin observa direita estragu infraestutura estrada no ponte, iha Bekusi, Dili, tersa ne’e.

Xefe Ezekutivu mós orienta ona Vise Primeiru-Ministru no Ministru Planu Ordenamentu, José Reis no Ministru Obra Públika, Salvador Eugênio Soares dos Reis Pires atu halo indetifikasaun emprezáriu sira ne’ebé la ajuda ajuda nasaun, maibé halo fali polítika.

“Ita ajuda ita-nia povu atu halo dezenvolvimentu no nasaun ita la presiza halo polítika, nune’e emprezáriu sira tenke ajuda iha momentu ne’ebé Estadu no Governu  presiza atu labele afeta ba ita-nia inan-aman sira,” PM Taur apela.

PM Taur hato’o kestaun ne’e tanba foin daudaun iha situasaun emerjénsia iha sábadu no domingu ne’e iha emprezáriu barak taka telefone bainhira Governu presiza sira-nia apoia.

Notísia relevante: MPO-MOP husu emprezáriu mobiliza ekipamentu pezadu normaliza impaktu dezastre naturál

Xefe Governu husu emprezáriu sira atu apoiu hasai no tula sedimentasaun sira iha mota hodi labele fó risku ba komunidade.

“Aproveita oportunidade ida-ne’e, husu ba emprezáriu timor-oan atu sira atubele ajuda halo normalizasaun ba ponte no estrada sira,” nia akresenta.

PM konsidera, situasaun ne’e presiza mobiliza kbiit hamutuk hodi regulariza mota liuhosi limpreza jerál, tanba Governu kontinua esforsu ho rekursu ne’ebé iha atu fó asisténsia ba sidadaun afetadu sira.

Aleinde ne’e, PM Taur dehan presiza Bee Timor-Leste (BTL) no Eletrisidade de Timor-Leste (EDTL) kontinua hadi’a kanalizasaun bee-moos no eletrisidade atu nune’e komunidade bele asesu lalais.

“Ita haree daudaun ne’e Institutu Jestaun Ekipamentu (IGE, sigla portugés) hahú esforsu maka’as hodi hasai sedimentasaun iha mota laran, estrada, edifísiu públiku inklui populasaun nia uma atubele normaliza,” nia subliña.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here