Primeiru-Ministru, Taur Matan Ruak. Imajen TATOLI/Egas Cristóvão

DILI, 06 abríl 2021 (TATOLI)—Primeru-Ministru (PM), Taur Matan Ruak, lamenta ho atitude grupu balun ne’ebé lansa informasaun boatu ba públiku katak Tsunami sei mosu iha Timor-Leste.

“Iha grupu ida kalan-kalan la’o ho karreta hodi hakilar dehan Tsumani sa’e. Ha’u fó ona instrusaun ba Vise Ministru Interiór no Polísia atu halo identifikasaun ba ema ne’ebé kalan-kalan soe buatu hodi halo pániku populasaun, horikalan ema balun halai tanba ema soe buatu dehan Tsunami sa’e,” PM hateten bainhira halo observasaun iha Ponte Bekusi, Becora, tersa ne’e.

Tanba ne’e, nia parte apela ba populasaun hodi labele fiar informasaun falsu tanba autoridade kompetente fó sai ona informasaun klaru.

Notísia relevante: DNMG rejeita informasaun Tsunami sei mosu iha Timor-Leste

Tuir atuál Ministru Interiór ne’e, bainhira Polísia Nasionál Timor-Leste (PNTL) halo ona identifikasaun ba grupu hirak ne’e, sei lori ba prosesu justisa tanba konsidera hanesan inimigu ba Estadu Timor-Leste.

“Hetan sira, ha’u haruka ka’er hotu no lori ba hatama iha Becora tanba sira hanesan inimigu nasaun. Agora iha períodu Estadu Emerjénsia no iha kalamidade ne’ebé ita labele halimar ho ema ida-rua tanba de’it beik oituan,” Xefe Governu hatutan.

Xefe Ezekutivu kontra hahalok a’at hotu ne’ebé mosu iha kalamidade nia laran.

“Ita husu sira atu kuidadu no labele demais liu, maski ita-nia rai ne’e adota sistema demokrasia, maibé sidadaun hotu iha lei nia okos,” nia subliña.

Entretantu, Diresaun Nasionál Metrolojia no Jeofízika (GNMG, sigla Portugés) rejeita ona informasaun ne’ebé espalla iha públiku liuhosi rede sosiál katak komesa horisehik (05/04) ba oin Timor-Leste ameasadu enfrenta Tsunami.

DMNG ona klarifika katak sistema metorolójiku baixa presaun lokaliza iha Tasi Timór no daudaun dezloka ona ba tasi Nusa Tenggara Timur (NTT), tanba ne’e sei la implika Tsunami iha territóriu nasionál Timor-Leste.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here