Ministru Prezidénsia Konsellu Ministru, Fidelis Manuel Leite Magalhães, apoia vítima dizastre naturál iha edifísiu CVTL, iha Bairro Formosa, tersa (06/04). Imajen/Mídia PCM

DILI, 06 abríl 2021 (TATOLI)-Atuál Ministru Prezidénsia Konsellu Ministru, Fidelis Manuel Leite Magalhães, ho inisitiva rasik fó apoia pesoál osan ba vítima afetada dezastre naturál ne’ebé refujia iha edifísiu Cruz Vermella de Timor-Leste (CVTL, sigla portugés).

“Ha’u mai vizita CVTL no mai hanesan kapasidade pesoál atu fó apoiu tuir kbi’it ne’ebé ha’u iha, hosi saláriu rasik  hanesan membru Governu ba fulan ida ne’e,” Nia hateten ba jornalista sira hafoin halo vizita vítima inundasaun iha CVTL, Bairro Formosa, tersa ne’e.

Notísia relevante: Inan ho oan nurak konsege salva-an hosi inundasaun

Nia parte fó apoiu osan ho montante $3.000, ne’ebé entrega ba Dirijente instituisaun ne’e.

“Hanesan timor-oan ba rai ida-ne’e, ha’u iha obrigasau bele kontribui liuhosi CVTL atu apoia ba populasaun sira. Ha’u mós hakarak tulun maluk barak maibé ida-ne’e la’ós apoiu Governu nia maibé tuir ha’u-nia kapasidade no kbi’it rasik,” nia subliña.

Iha fatin hanesan Prezidente CVTL, Madalena Hanjam, agradese apoiu ne’e tanba bele ajuda sosa netik nesesida bázika ba vítima sira ne’ebé maioria inan ho oan nurak no labarik kiik-oan sira.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here