Kondisaun estrada ligasaun Aipelu ba Suku Fatumasi, Postu Administrativu Bazartete, Munisípiu Liquiça. Imajen Tatoli/Hortencio Sanchez

LIQUIÇA 06 abríl 2021 (TATOLI) – Dezastre naturál, rai-halai no udan-anin, sábadu-domingu (03-04/04/2021), lori taterus (sofrimentu) oioin ba povu Timor-Leste.  Abitante hamutuk 21 maka lakon vida no la sura ho sasán uma-laran no uma rasik naksobu.

Situasaun no kondisaun dezastre naturál ne’e destroi  mós  fasilidade públiku. Estrada barak iha territóriu nasionál kotu no estrada balun ai-tohar taka metin, inklui mós rai-halai taka metin estrada.

Notísia Relevante : Apoiu vítima dezastre naturál hotu konsentra iha SEPS

Estrada ligasaun Aipelu ba Suku Fatumasi, Postu Administrativu Bazartete, Munisípiu Liquiça, hetan estragus maka’as no fó ameasa boot ba movimentu transporte sira.

Administradór Postu Administrativu Bazartete, João Nascimento Braz, hateten, dezastre naturál ne’e forsa natureza ne’ebé mai la husu tuir ema nia vontade. Nia mai lori sofrimentu no hanesan kriatura ida tenke simu situasaun sira ne’e ho liman-rua.

“Dezastre naturál ne’e fó impaktu tebes, maibé ita labele halo buat ida tanba ne’e natureza, iha dalan ligasaun hosi Aipelu ba Fatumasi nian grave tebes fó ameasa boot ba transporte públiku sira halo movimentu ba mai,”  João Nascimento Braz informa Agência Tatoli iha nia uma Liquiça, segunda (05/04).

Notísia Relevante : Uma 100-resin iha Tibar hetan estragus

Nia dehan, estrada refere konstroi hosi kompañia  Canghai Construction iha 2019 ho fundu ne’ebé apoiu hosi Uniaun Europeia, maibé seidauk entrega ba Governu.

Nia mós informa katak estrada diresaun Suku Metagou, Postu Administrativu Bazartete ba Suku sira iha Postu Administrativu Liquiça kotu total, nune’e komunidade sira hosi Suku Leorema, Luklai no Darulete labele halo movimentasaun ba mai.

Nia apela ba komunidade sira sai vítima ba dezastre naturál ne’e atu mantein kalma tanba iha besik Governu sei distribui apoiu emerjénsia no normaliza hikas situasaun sira ne’e.

Notísia Relevante : Dezastre naturál iha TL, ema 21 lakon vida

Jornalista   : Hortencio Sanchez

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here