Populasaun Bairro Besi Tua okupa espasu iha foho leten João Paulo II, domingu (04/04). Imajen TATOLI/Domingos Piedade Freitas

DILI, 06 abríl 2021 (TATOLI)—Bankada Partidu Libertasaun Populár (PLP) husu Governu halo levantamentu no identifika lalais dadus vítima dezastre naturál nian iha territóriu nasionál, nune’e bele hetan númeru ho serteza.

Notísia Relevante: Dezastre naturál iha TL, ema 21 lakon vida

“Komisaun interministeriál halo levantamentu no identifika lalais dadus dezastre naturál ne’ebé foin akontese liu bá hodi identifika loloos ema lakon vida hamutuk na’in hira. Mezmu iha ona na’in-21 mak mate maibé seidauk serteza di’ak. Buka mekanizmu oinsá bele dezloka matebian na’in-hitu hodi fila ba Oé-Cusse hodi ba haloot iha sira-nia moris fatin,” Reprezentante Bankada PLP, Deputada Domingas dos Santos, propoin liuhosi plenária, tersa ne’e.

Iha opurtunidade ne’e, nia hatutan, Bankada PLP ho estrutura nasionál, munisipiu, postu, suku to’o  aldeia  hato’o sentimentu solidariedade no sentida kondelénsia kle’an  ba família sira-ne’ebé hetan sofre hosi dezastre naturál kauza hosi udan boot ne’ebé akontese iha loron 4 abríl 2021 foin lalais ne’e.

Nia dehan, Bankada PLP sente triste bainhira haree dezastre naturál no udan boot ne’ebé estraga komunidade nia hela fatin no estraga infreastrutura públiku sira iha territóriu tomak.

Tuir nia, akontesimentu dezastre naturál ida-ne’e kontribui tanba akontesimentu todan no dezafiu boot ida tan ba Timoroan tomak, liuliu VIII Governu bainhira haka’as-aan konsolida esforsu hodi ultrapasa propagasaun Surtu COVID-19 maibé mosu tán kalamidade boot.

Bankada PLP hanoin katak, nasaun tomak tenke halibur hamutuk ideia no esforsu materiál no immateriál hodi hakat liu lalais sofrementu ba dezastre naturál no mós COVID-19 nian. Bankada PLP hala’o vizita ba mate-isin iha Beduku no Hera, rona diretamente saida mak família matebian sira sente todan ho triste.

“Ami só fó korajen ba família matebian hodi simu realidade todan ida-ne’e. Ami fiar katak Maromak, rai-lulik sei la soe ita, no ita-nia orasaun mak sei lori esperansa hodi hakat liu situasaun ida-ne’e, forsa natureza ne’ebé ita hotu la espera,” Bankada PLP hato’o nia deklarasaun polítika.

Iha biban ne’e, Bankada PLP hakarak hato’o agradese ua’in ba padre, madre, komunidade balun, kompañia ETO, Tino Lina no parseiru internasionál ne’ebé ajuda makaas ba vítima dezastre naturál sira.

Bankada PLP konsidera jestu kolaborasaun ide-ne’e ajuda Governu hodi fó kontribuisaun tuir ida-idak ninia forsa no kbiit liuhusi sentru evakuasaun hamutuk 11 iha Dili laran  ho totál komunidade hamutuk na’in-7,030.

Bankada PLP fó apresisaaun Primeiru-Ministru Taur Matan Ruak no membru Governu tomak  maibé rekomenda liuhosi Ministériu Soliridade Sosiál no Inkluzaun (MSSI) kolabora hamutuk padre Salesiano Don Bosco, madre Canosiona, madre Salisiana sira hodi tulun no oferese fatin ba komunidade sira hodi hakmaan-aan fasilita fatin evakuasaun, no distribui hodi fó ajuda mós kaixaun ba komunidade balun ne’ebé lakon sira-nia vida iha dezastre naturál ida-ne’e.

Iha parte seluk, Bankada PLP hato’o solidariedade ba nasaun viziñu Indoésia liuliu Kupang (NTT), Flores, ne’ebé hetan dezastre kalamidade boot hanesan mós povu Timor-Leste enfrenta daudaun ne’e.

Notísia Relevante: PN aprova votu pezár ba vítima dezastre naturál

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here