Deputadu Francisco Branco. Imajen/TATOLI

DILI, 06 abríl 2021 (TATOLI)—Bankada Frente Revolucionária de Timor-Leste Independente (FRETILIN) apela ba povu tomak atu hametin unidade nasionál hodi responde kalamidade dezastre naturál no pandemia COVID-19.

“Apela ba povu tomak hametin unidade nasionál iha tempu susar ida-ne’e. Situasaun ida-ne’e la’ós ita mai atu hatudu liman ba malu, maibé situasaun ida-ne’e obriga ita atu hamutuk. Iha situasaun ne’ebé ita-nia povu no nasaun hasoru presiza ita-nia unidade nasionál atu metin liután, hodi responde ba kalamidade dezastre natural no COVID-19,” Xefe Bankada FRETILIN, Deputadu Francisco Miranda Branco, levanta iha plenária, tersa ne’e.

Nia hatutan, Bankada FRETILIN apela ba hotu-hotu atu unidade, atu serví no tulun povu ne’ebé enfrenta dezastre naturál iha territóriu nasionál.

Xefe Bankada FRETILIN ne’e apela ba solidariedade unidade sidadaun hotu-hotu ninian, ne’ebé tulun malu harii no hadi’a hikas uma, bairru no kapitál RDTL.

“Dala ida tán unidade ita hotu-hotu nian, la’ós tempu atu fila kotuk ba malu hodi hatuur-aas ita-nia povu no ita-nia Estadu ne’ebé oras ne’e daudaun sei hasoru mukit, mai ita hamutuk serví ita-nia rai no serví ita-nia ema,” Xefe Bankada FRETILIN fó hanoin ba povu tomak.

Nia hateten, Bankada FRETILIN mós louva inisiativa solidariedade hosi individu no grupu sira-ne’ebé fó apoia umanitária ba vítima sira hosi inundasaun ne’e, no louva mós Governu nia prontidaun, protesaun sivíl, bombeiru, MSSI, IGE, PNTL, F-FDTL, Cruz Vermella, MAE, xefe suku, aldeia, emprezariu sira-ne’ebé dezde primeira ora mobiliza esforsu tomak hodi tulun vítima sira-ne’ebé presiza tulun.

Tuir nia, Bankada FRETILIN mos louva ba sidadaun sira-ne’ebé organiza malu hodi te’in no haan hamutuk, hamoos lisuk uma sira iha bairru-laran, bee-dalan no estrada hodi tulun Governu.

Deputadu Francisco Miranda Branco louva madre sira iha Dili laran ne’ebé oferese fatin ba simu no atende vítima hosi inundasaun no rai-monu.

“Dezastre ida-ne’e afeta ita hotu no ita hotu hamutuk mak bele hakat liu situasaun defisil ne’ebé ita-nia Povu no Nasaun hasoru,” nia dehan.

Nia hateten, Bankada FRETILIN dezde uluk kedas ko’alia no hakilar kona-ba ordenamentu Sidade Dili hanesan kapitál republika, planeamentu urbanu ba kapital Dili ho sistema drainajen ne’ebé di’ak.

“Maibé, agora la’ós tempu atu ita ko’alia, tempu ba ita atu hamutuk hodi servisu hamutuk, atu hatán ba situasaun kalamidade ida-ne’e,” Xefe Bankada FRETILIN ne’e apela.

Bankada FRETILIN iha deklarasaun polítika hateten, Estadu hasoru hela COVID-19 ne’ebé Timor-oan hotu halo esforsu komún atu proteje populasaun, atu labele sai vítima ba moras ida-ne’ebé hasai ema rihun ba rihun ihá mundu tomak nia klamar.

“Ita hola medida prevensaun no mitigasaun, konfinamentu obrigatóriu ho serku sanitáriu, atu evita virus ida-ne’e labele hada’et iha komunidade nia leet. Ita sakrífika ita-nia ekonomia no ita-nia povu rasik, estudante ho traballadór setór privadu, agrikultor, xofer taxi, mikrolet, kamioneta ho bís (autocarro), loja no komersiante sira, otél no restaurante sira, ho objetivu komún ida de’it hasoru inimigu komún COVIDd-19,” refere deklarasaun polítika bankada FRETILIN.

Bankada FRETILIN presta omenajen ba Timor-oan sira-ne’ebé lakon vida ihá dezastre naturál ne’ebé mosu iha Timor-Leste, ihá loron 4 abríl liubá no hato’o sentida kondolénsia ba família sira-ne’ebé tutur lutu-metan iha sira-nia ulun.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here