Ministru Francisco Jerónimo no Prezidente Konsellu Administrasaun RTTL, E.P, Francisco Gari, observa eskritóriu RTTL ne'ebé bee tama hodi estraga ekipamentu. Imajen Mídia MAPKOMS

DILI, 05 abríl 2021 (TATOLI)—Ministru asuntu Parlamentár no Komunikasaun Sosiál (MAPKOMS), Francisco Jerónimo, observa direta fasilidade RTTL ne’ebé hetan estraga hosi inundasaun, iha domingu (04/04).

Ekipamentu transmisaun ninian, komputadór no fasilidade sira seluk hetan estraga tanba ne’e RTTL labele funsiona hanesan babain hodi atende públiku liuhosi intormasaun.

Área RTTL akontese bee-lihun. Imajen Mídia MAPKOMS

“Hanesan ohin bá RTTL ho hanoin ida katak dalan saida no solusaun ne’e saida presiza halo buat ida lalais atu rezolve problema emerjénsia, liuliu relasiona ho dezastre naturál ne’e,” Ministru Francisco dehan ba jornalista hafoin vizita edifísiu RTTL, Caicoli, domingu ne’e.

Hafoin ramata vizita RTTL, Ministru MAPKOMS mós la’o hale’u kapitál Dili hodi observa kalamidade ne’ebé hamate populasaun no estraga sasán barak.

“Situasaun ida-ne’e perigu tebes. Tanba ne’e mak iha obrigasaun bá haree no komunika malu ho membru Governu sira sira seluk atubele fó solusaun ba problema sira-ne’e,” Francisco Jerónimo informa.

Medida urjente ne’ebé Governu halo ona mak hanesan neutraliza situasaun iha Palásiu Prezidensiál liuliu hasai fo’er sira ne’ebé mak sulan iha ponte, iha Becora no Tibar no iha fatin seluk iha área Dili no munisípiu mós halo serbisu namanas hela.

“Situasaun ida-ne’e fó hanoin ba ita atu fó atensaun lalais nune’e bele solusiona problema ne’ebé mak akontese,” Francisco subliña.

Jornalista: Arminda Fonseca
Editór: Xisto Freitas

HAKEREK NO HATÁN

Please enter your comment!
Please enter your name here