Empreza Bandido Qualidade Motor prepara foos atu fahe ba vítima dezastre naturál sira iha área tasi Tolu, Dili. Imajen/Facebook; Bandido Qualidade.

DILI, 05 abril 2021 (TATOLI)—Diretór Empreza Bandido Qualidade Motór, Marito Gambóa informa, ohin, ho inisiativa rasik no urjentemente fó apoiu solidariedade hodi fahe foos saka 1.000 ba vítima dezastre naturál hamutuk uma-kain 1.000 iha área Tasi Tolu, Dili. 

Notísia Relevante: Apoiu vítima dezastre naturál hotu konsentra iha SEPS

Diretór Empreza Bandido Qualidade Motor, Marito Gamboa. Imajen/Espesiál.

“Objetivu ohin fahe foos ne’e, hanesan asaun karidade ida tanba komunidade iha Tasi Tolu maioria hetan inundasaun ka bee tama sira-nia uma. Tanba ne’e, ha’u foti dezisaun urjente fó apoiu foos saka 1.000 ba komunidade hamutuk uma-kain 1.000, tanba maioria mai iha ha’u-nia fatin, sira tanis dehan hahan laiha atu konsumu,” Marito Gambóa informa ba Agência TATOLI, liuhosi telefónika, segunda ne’e.

Apoiu ne’e nia bele realiza, tuir nia, bazea ba ninia inisiativa rasik hodi kontantu no halo kooperasaun ho Xefe Suku Madohi ho nia Xefe Aldeia sira iha Suku Madohi hodi rekolla vítima sira-nia dadus hosi kada uma-kain ne’ebé afeta ba dezastre naturál ne’e.

“Ha’u kontaktu kedas ho Xefe Aldeia sira prepara lista ba ita-nia maluk sira-ne’ebé afetadu ba inundasaun ne’e, no sira rekolla katak iha uma-kain 1.000 mak afeta ba inundasaun. Entaun, ohin, hahú tenke fahe ona foos ba vítima sira,” na’in ba empreza Bandido Qualidade ne’e dehan.

Nia hatutan, vítima sira-ne’ebé hetan apoiu foos hosi Empreza Bandido Qualidade Motor ne’e kompostu hosi Aldeia rua mak hanesan Aldeia 12 de Outubru no Aldeia Terra Santa, Suku Madohi nian.

“Entaun maneira ne’ebé ita fahe foos ne’e uma-kain ida hetan foos saka ida. Entaun, hosi uma-kain 1.000 ne’e, ohin ita fó apoiu ona ba uma-kain 250 tanba kondisaun udan ne’ebé aban mak ita kontinua fali fahe foos,” nia subliña

Nia afirma, daudaun ne’e sei iha vítima uma-kain rua mak agora daudaun ne’e sei hela provizóriu iha ninia rezidénsia tanba vítima sira-nia fatin to’o agora seidauk bele hela tanba kondisaun grave uitoan.

“Vítima sira-ne’ebé daudaun ne’e sei hela iha ha’u-nia fatin ne’e, tanba sira-nia uma seidauk bele hela. Entaun, daudaun ne’e dadeer sira ba hamoos sira-nia uma hafoin kalan mak mai toba fali iha ne’e,” nia hateten.

Nia hatutan, ba apoiu ne’ebé ohin nia halo la’ós to’o de’it iha loron ohin ne’e maibé karik iha ema balun ne’ebé presiza husu nia apoiu, nia parte prontu no sei fó ba ema seluk tuir kbiit ne’ebé nia iha.

“Kona-ba ajuda ka tulun malu ne’e vokasaun ida no kbiit ne’e mai hosi Maromak. Ne’ebé, ha’u labele halo predisaun maibé nu’udár timoroan sei tulun malu iha situasaun defisil saida de’it tanba daudaun ne’e ema barak mak sai vítima ba inundasaun. Tanba ne’e, ha’u husu ba maluk timoroan sira-ne’ebé iha hahan ka osan uitoan, mai ita hamutuk lolo-liman ba ita-nia maluk sira-ne’ebé presiza ita-nia tulun,” nia dehan.

Notísia Relevante: Dezastre naturál iha TL, ema 21 lakon vida

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here