Primeiru-Ministru, Taur Matan Ruak. Imajen TATOLI/Egas Cristóvão

DILI, 04 abríl 2021—Udan boot ne’ebé rezulta inundasaun iha kapitál Dili iha domingu ne’e, konsege halakon sasán, estraga infraestrutura públika no privada inklui halo lakon ema nia vida.

Ba kestaun ne’e, Primeiru-Ministru (PM), Taur Matan Ruak, manifesta solidariedade no kondolénsia kle’an ba família ne’ebé lakon nia ema kauza hosi dezastre naturál.

“Hodi Governu no ha’u-nia naran rasik, hakarak hato’o ha’u-nia solidariedade no kondolénsia kle’an ba família matebian sira ne’ebé mak sofre hosi inundasaun ida-ne’e,” mensajen Xefe Governu, hanesan haktuir iha nota imprensa ne’ebé Agência TATOLI asesu, domingu ne’e.

PM Taur tristre haree situasaun dezastre naturál ne’ebé hamosu estragu maka’as no halakon komunidade nia vida.

Tanba ne’e, Xefe Ezekutivu hato’o mós orasaun ba família no vítima sira no otimista bele liu situasaun difísil ne’e.

“Ha’u dezeja vítima sira bele forsa iha tempu susar ida-ne’e no hein ita hotu sei ultrapasa sofrimentu ne’e. Governu sei halo esforsu hotu hodi ajuda família sira ne’ebé sai vítima ba dezastre naturál ida ne’e,” nia subliña.

Udan boot akontese kuaze iha kapitál Dili, iha domingu madrugada tuku 02:00 iha oras sia nia laran, rezulta inundasaun ho volume boot.

 Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here