Mota tama no sobu uma kauza hosi udan-boot ne'ebé akontese iha 03-04 abríl 2021. Imajen espesiál.

DILI, 04 abríl 2021 (TATOLI)—Previzaun hosi Diresaun Nasionál Meteorolojia Geofízika (DNMG) katak posibilidade akontese udan ho intensidade variável (fraku to’o forte liu) sei kontinua to’o aban (05 abríl 2021) akompañadu ho anin-boot.

Rejiaun no munisípiu ne’ebé sei akontese udan no anin-boot tuir informasaun ne’ebé Agência TATOLI asesu hosi DNMG, ohin, mak hanesan RAEOA, Manatuto, Bobonaro, Liquiçá, Baucau, Dili no Ataúro, Aileu no Ermera.

Risku sira mak hanesan bee sa’e, muta-tún, rai-monu/halai no kondisaun laloran sei sa’e hannesan; kosta norte laloran nia aas vária hosi metru 0.25-1.25 metru (normál-moderadu). Kosta súl laloran nia aas vária hosi metru 0.5-1.75 (normál-moderadu).

Eventuál ida-ne’e akontece tanba hetan influensiadu hosi sistema meteorolójiku sira ne’ebe mak estabelesidu hanesan: Monsaun Ázia, ENSO-La nina fraku, Madden–Julian Oscillation (MJO) no mós iha efeitu husi diferensa presaun ne’ebé mak atualmente observa iha teritóriu Timor hodi impulsiona no intensífika Brisa Marritima.

Notísia relevante:Ema na’in ualu mate iha akontesementu dezastre naturál

Tanba ne’e, DNMG apela ba komunidade en-jerál iha teritóriu, prinsipalmente ba komunidade iha munisípiu ne’ebé temi iha leten, liuliu sira ne’ebé hela besik área risku sira atu toma atensaun no kontinua akompaña informasaun no alerta hosi instituisaun relevante sira ba eventu extremu hodi evita dezastre ne’ebé hotu-hotu la espera.

Husu mós ba viajante sira ne’ebé mak dezloka ba munisípiu sira hodi hala’o atividade ruma, atu tau atensaun ba udan no anin-boot refere. No Kontinua hadook an hosi fatin risku, hanesan ai-hún boot, liña eletrisidade, mota no seluk tan.

“Kuandu iha situasaun emerjénsia bele kontatu autoridade lokál no pesoál hosi Protesaun Sivíl iha munisípiu sira,” DNMG sujere.

Jornalista: Nelson Sousa

Editór: Xisto Freitas

HAKEREK NO HATÁN

Please enter your comment!
Please enter your name here