Mota sobu estrada iha aldeia Fatuk Francisco, hafoin inundasaun, domingu (04/04). Imajen TATOLI/Domingos Piedade Freitas

DILI, 04 abríl 2021 (TATOLI)—Populasaun aldeia Fatuk Francisco, suku Kamea, postu administrativu Cristo Rei, husu Governu halo intervensaun ba mota tanba sobu estrada no besik abitante sira-nia hela fatin.

Tuir abitante Miguel Fernandes, inundasaun rezulta mota Becora sae maka’as no konsege estraga duni estrada iha aldeia Fatuk Francisco no área terminál Becora.

“Ami, populasaun iha área ne’e sente hakfodak bainhiria tuku 05:00 dadeer bainhira hadeer mai, mota komesa sobu estrada sira, tanba ne’e ami husu Governu halo intervensaun lalais normaliza mota,” Abitante ne’e dehan ba Agência TATOLI, iha ninia hela fatin, domingu ne’e.

Tuir nia, família lima maka hela besik área risku dezastre naturál, tamba ne’e abitante sira iha área ne’e husu ba entidade kompetente hodi ba haree kondisaun estrada no responde urjentemente.

“Se la toma atensaun lalais, bainhira mota maka’as tan bele sobu komunidade nia hela fatin,” nia akresenta.

Tuir abitante ne’e, maski inundasaun iha área besik mota Becora ho volume maka’as, maibé la rezulta ema ruma mate ka hetan asidente grave ruma tamba populasaun hotu toma atensaun ba dezastre naturál.

Iha fatin hanesan, abitante iha suku hanesan, Adelino da Costa Soares, haktuir kondisaun ne’ebé sira enfrenta ho matan-ben no husu Ministériu Obra Públika (MOP) responde sira-nia preokupasaun.

“Governu presiza halo intervensaun lalais iha fatin akontesimentu atu labele estraga ami-nia hela fatin, nune’e ami bele moris ho seguru tamba hau-nia uma besik mota ne’e,” nia tenik.

Jornalista: Domingos Piedade Freitas

Editora: Julia Chatarina

HAKEREK NO HATÁN

Please enter your comment!
Please enter your name here