Mota Becora konsege estraga estrada iha área terminál Becora, kauza inundasaun, domingu (04/04). Imajen/Domingos Piedade Freitas

DILI, 04 abríl 2021 (TATOLI)–-Xefe aldeia Fatuk Francisco, suku Kamea, postu administrativu Cristo Rei, Judit de Jesus da Silva, hateten, inundasaun ne’ebé akontese domingu madrugada to’o fali ohin lorokraik, konsege hamosu inundasaun iha fatin oioin inklui estraga área terminál Becora.

“Ha’u hanoin kona-ba ponte Becora, ema hotu haree rasik ba, nune’e mota lori aii boot de’it taka ponte Becora ne’ebé bele suli sae ba estrada no estraga área terminál inklui kios hirak ne’ebé mak hela besik iha mota ninin,” Xefe aldeia informa ba Agência TATOLI, iha ninia hela fatin, aldeia Fatuk Francisco, área iha terminál Becora, domingu ne’e.

Nia dehan, Governu liuhosi Ministériu Obra Públika (MOP) ninia ekipa téknika balun ho eskavator halo intervensaun iha mota maibé seidauk finaliza tamba ai barak demais no balun espalla iha estrada leten.

“Husu ba Ministériu Obra Publika, bele hases tiha ai boot sira ne’ebé mota lori iha ponte Becora no balun ne’ebé mak taka estrada hodi difikulta movimentu,” nia akresenta.

Nu’udar autoridade lokál, nia parte husu ba ministériu relevante sira atu serbisu hamutuk hodi fó solusaun lalais problema ne’ebé mak populasaun hasoru ohin loron.

Nia mós nota katak kauza inundausaun konsege estraga etrada públika ne’ebé mak besik loos mota ninin no estrada balun terminál nian.

Jornalista: Domingos Piedade Freitas

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here