Estrada ligasaun Liquiçá-Ermera. Imajen/Hortencio Sanchez

LIQUIÇÁ, 04 abríl 2021 (TATOLI)—Udan monu durante oras sia nia laran, hahú madrugada domingu ne’e, rezulta inundasaun no konsege hakotu estrada ligasaun Ermera-Dili-Liquiçá.

Xefe suku Tibar, munisípiu Liquiçá, Bento Coreia da Silva, hateten dezastre naturál ne’ebé akontese difikulta tebes movimentasaun transporte públiku.

“Ohin iha Tibar estrada rua mak kotu, ida mak dalan sae ba fatin lixu no ida iha Tibar, Raihun, dalan ba Ermera. Ha’u rekomenda ba nasionál se bele haruka mákina balun mai hodi halo normalizasaun fali,” Autoridade suku informa ba Agência TATOLI, via telefónika, domingu ne’e.

Hatan ba kestaun ne’e, Administradór postu administrativu Bazartete, João Nacimentu Braz, hateten nia parte orienta Diresaun Nasionál Dezastre no Risku munisípiu Liquiçá hodi haree kestaun ne’e.

“Ida-ne’e dezastre ida mai hosi natureza, ita labele halo buat ida. Ha’u sei hato’o ba autoridade munisipál atu haree no rezolve. Ita haree nasionál mai ladi’ak tanba iha hela situasaun serka sanitária, entaun munisípiu rasik mak sei buka meiu atu rezolve,” Administrador ne’e dehan.

Tuir observasaun Agência TATOLI iha terrenu, karreta no motor hosi dirasaun munisípiu Ermera bá área besik Dili ladi’ak, to’o iha Tibar de’it.

Jornalista: Hortencio Sanchez

Editora: Julia Chatarina

HAKEREK NO HATÁN

Please enter your comment!
Please enter your name here