Kondisaun mota iha área Becora, hafoin udan boot, iha domingu (04/04). Imajen TATOLI/Domingos Piedade Freitas

DILI, 04 abríl 2021 (TATOLI)—Abintante kuaze 200-resin iha aldeia Bekusi Sentru, Bekusi Leten no kraik, suku Bekora, postu administrativu Becora, munisípiu Dili, hetan impaktu inundasaun hafoin udan ho intensidade boot, ne’ebé akompaña ho anin iha domingu madrugada tuku 02:00 to’o meiu dia.

Abitante dezastre naturál ne’ebé hela besik ponte Bekusi, ponte simitériu Bekusi, no ponte iha eskola STM inklui ponte iha Eskola 5 de Maio, konfesa katak mota nakonu ho sedimentasaun, tanba ne’e presiza intervensaun lalais hodi evita bee sa’e maka’as estraga abitante sira-nia uma.

“Ami-nia sasán estraga barak, maibé laiha ema lakon vida ba inundasaun ne’e. Ami husu Ministériu Obra Públika liuhosi Institutu Jestaun Eiipamentu (IGE, sigla portugés) atubele hasai sedimentasaun iha mota hodi prevene bee sa’e maka’as,” Abitante Bekusi Sentru, Nelson da Costa, hateten ba Agência TATOLI, iha Bekusi Sentru, Dili, domingu ne’e.

Notísia relevante: IGE konsentra normaliza mota área risku ba populasaun

Abitante ne’e haktuir, domingu madrugada udan mai ho intensidade boot no bee sa’e maka’as hodi komunidade nia tama uma-laran no estraga sasán barak.

“Sasán uma laran hanesan roupa no sasán dapur kuaze bee lori hotu, maibé dokumentu importante sira ami konsege salva,” nia akresenta.

Sorin seluk, Komunidade Bekusi, Zelazio Miranda, hateten udan boot iha tempu naruk halo abitante sira iha situasaun difísil nia laran atu salva-an no sasán.

“Ami-nia uma bee tama dezde tuku 2:00 madrugada, maibé sasan importante sira ami konsege salva hotu, balun mak la konsege salva,” Abitante ne’e konta tuir ho laran triste.

Tuir observasaun Jornalista Agência TATOLI iha terrenu, nota katak udan no anin boot konsege rezulta ai-hun boot ida iha eskola Tékniku Vokasionál Becora nia kotuk monu hodi taka estrada dirasaun Taibesi ba Becora.

Aleinde ne’e, uma tolu mak ai monu ba leten maibé uma-na’in konsege salva-an hosi dezastre naturál ne’e.

Antes ne’e IGE hahú hasai ona sedimentasaun iha ponte Bekusi, ponte Maufelu no seluk tan ne’ebé sai risku ba inundasaun.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here